PNTL bandu joven labele hemu tua iha dalan públiku durante natal no tinan foun

DILI, 16 dezembru 2024 (TATOLI) – Komandante Operasaun Polísia Nasionál Timor-Leste (PNTL), Inspetór Xefe Polísia Jose Luis Amaral, dehan PNTL bandu joven sira atu labele hemu tua ih dalan públiku durante selebrasaun natal no tinan foun.
Amaral salienta katak dala barak iha natal no tinan foun sempre iha mosu problema iha dalan públiku tanba joven sira konsumu tua. Atu evita ida-ne’e mak PNTL apela atu bandu joven sira labele hemu tua iha dalan públiku.
¨Joven sira ne’ebé mak halibur malu iha dalan públiku mak hemu tua, ami sei la tolera¨, Inspetór Xefe Polísia hateten ba jornalista sira iha edifísiu Komandu PNTL Dili Caicoli, Segunda, ohin.
Nia dehan, kuandu joven sira mak halibur malu iha uma mak hemu ne’e direitu, PNTL sei la lamenta ida-ne’e, maibé kuandu hemu dalan públiku ne’e PNTL sei atua.
¨Halibur malu iha sira-nia uma ne’e, sira-nia direitu maibé kuandu iha ona fatin públiku mak ami sei atua tanba dala barak bele dehan mosu buat ne’ebé maka la espera, hanesan halo fali konfrontu iha dalan públiku ne’e tanba maioria mai husi lanu¨, nia adianta.
Komandante Operasaun informa katak Komandu PNTL Munisípiu Dili, atualmente, simu ona diretiva ida husi Komadante Jerál katak husu ba Komandu PNTL munisipál idaidak inklui atu prepara planu operasaun seguransa ba natal nian.
Komandu PNTL Dili konvoka ona enkontru ho Komandante Operasaun Dili atu koalia kona-ba planu operasaun seguransa ba natal nian.
¨Hahú ohin kalan, ami halo operasaun ba fatin sira ne’ebé ami konsidera risku ba konflitu. Ami mós sei halo operasaun ba fugetes no paixon sira ne’ebé lian iha bairro, kuandu ami hetan iha komunidade ida mak sunu, ami sei halo atuasaun ba ida-ne’e¨, nia konklui.
Jornalista: Natalino Costa
Editór : Zezito Silva

