Top

PNTL detein suspeitu na’in-rua envolve konfrontu feira Palásiu Prezidensiál

Logotipu PNTL. Imajen/Espesiál

DILI, 16 dezembru 2024 (TATOLI) – Komandante Operasaun Polísia Nasionál Timor-Leste (PNTL) Inspetór Xefe Polísia, Jose Luis Amaral, hateten polísia detein ona suspeitu na’in-rua ne’ebé envolve iha konfrontu iha feira iha Palásiu prezidensiál ne’ebé rezulta Diretór Midia SMNews Timor hetan pankada iha parte inus.

Jose haktuir, antes ne’e PNTL detein ema na’in-tolu maibé hafoin halo identifikasaun, suspeitu ida minoridade, entaun PNTL deside haruka fila, no suspeitu na’in-rua mak agora daudaun detein hela iha sela.

¨Suspeitu ne’ebé ita detein ne’e mak ho inisiál MN no LRJ, sira na’in-rua ne’e mak agora detein hela iha sela detensaun hodi kumpre oras 72 molok aprezenta ba Ministériu Públiku hodi submete ba Primeiru Interrogatóriu judisiáriu iha Tribunál¨, Inspetór Xefe Polísia, Jose Luis Amaral, dehan ba jornalista sira iha edifísiu Komandu PNTL Dili Caicoli, Segunda, ohin.

Nia subliña katak konfrontu ne’e akontese iha sesta (13/12) tuku 11:00 kalan foin lalais ne’e.

¨Iha konfrontu ne’e entre grupu arte marsiál no arte rituál mak provoka malu no husi konfrontu ne’e rezulta Diretór SM señor Mariano mak kanek no momentu ne’eba nia kontaktu kedan ha’u no ami-nia ekipa tun kedan ba terenu no kaptura kedan suspeitu na’in-tolu¨, nia adianta.

Nia dehan, iha suspeitu balun mak sei halai sees husi prosesu ne’e maibé momentu ne’e ekipa ba to’o kedan suspeitu sira-nia uma .

¨Restu ami sei buka tuir, ami buka no ami sei buka tuir nafatin. Tanba foin daudun ami ba sira-nia uma, sira sei halai sees maibé parte PNTL sei buka tuir nafatin hodi kaptura no halo identifikasaun hodi lori ba Tribunál, tanba tuir papel polísia nia katak iha ida mak ami sempre buka tuir suspeitu ne’ebé mak  envolve kazu sira ne’ebé iha, para nia bele responsavel ba krime ne’ebé nia halo¨, nia afirma.

Inspetór dehan, motivu husi kazu ne’e tanba grupu rua ne’ebé mak mai partisipa feira ne’e provoka malu to’o ikus mak alastra ba konfrotu.

¨Ha’u hanoin iha feira ne’e sempre akumula ema barak. Kuandu ema barak sira aproveita sadik malu ne’e dehan kenakalan remaja, ne’e sempre mosu konfrontu no kenakalan remaja ne’e mak afeta ba komunidade hotu. Maibé ha’u dehan, se de’it mak  halo krime iha munisípiu Dili, ami sei la tolera¨, nia informa.

Inspetór Xefe polísia ne’e agredese ba komunidade sira ne’ebé momentu ne’e informa konfrontu ne’e ba polísia no ida-ne’e hatudu katak komunidade hahú kontribui ona ba seguransa katak seguransa  la’os ona responsavel polísia nia maibé komunidade kontribui ona hodi informa ba  PNTL atu bele halo atuasaun.

Jornalista: Natalino Costa

Publisidade

Leave a Reply

Latest Post

error: Content is protected !!