PR Horta vizita Bangladesh hodi hametin relasaun bilaterál
DILI, 16 dezembru 2024 (TATOLI) – Prezidente Repúblika, José Ramos-Horta, hala’o vizita ofisiál ba nasaun Bangladesh hodi hametin relasaun bilaterál entre nasaun rua.
Vizita ne’e hetan autorizasaun husi Parlamentu Nasionál Timor-Leste, nu’udar bainaka onradu espesiál ba iha selebrasaun Loron Vitória iha Bangladexe nian iha loron 16 Dezembru.
Vizita ne’e hetan konvite husi nia belun di’ak Muhamad Yunus hanesan mós premiadu laureadu ba pás iha tinan 2006 no atual Xefe Konselleiru ba Governu Bangladeze (Primeiru Ministru Interinu), destaka importánsia husi relasaun entre nasaun rua ne’e no rekoñesimentu ba kna’ar Ramos-Horta nian nu’udar líder mundiál iha konstrusaun dame no demokrasia.
Tuir ajenda, iha loron 15 dezembru, Xefe Estadu hahú ona nia vizita ofisiál ho enkontru tete-a-tete (one-to-one) ho Primeiru-Ministru Interinu Bangladesh, Muhammad Yunus, iha nia servisu fatin Shimul.
Tuir kedas ho diskusaun bilaterál entre delegasaun nasaun rua nian. Ramata enkontru Líder nain-rua, asiste serimónia asinatura Memorandu Entendimentu (MoU) akordu ne’ebé asina husi Ministru Negósiu Estranjeiru no Kooperasaun, Bendito Freitas ho Ministru Negósiu Estranjeiru Bangladesh nian, kona-ba izensaun vístu bá titulár passaporte servisu no diplomátiku entre nasaun rua.
Alende ne’e selebra mós Memorandu Entendimentu sobre ‘Regular Foreign Office Consultation’ entre Timor-Leste ho Bangladesh.
“Prezidente Repúblika sei partisipa iha serimónia resesaun bá selebrasaun tinan 54 Loron Vitória Bangladexe nian. Vizita mós Savar Memoriál Mártires Nasionál Bangladesh no ajenda importante seluk tan,” tenik iha nota ne’ebé Agência TATOLI asesu hosi media Gabinete Prezidensiál, ohin.
Nune’e, Prezidente Ramos-Horta partisipa iha bankete estadu nian ne’ebé ofrese hosi Honorável Konselleiru Xefe Governu iha Salaun, Pan Pasífiku Sonargaon Dhaka.
Durante iha Bangladesh, Prezidente Ramos-Horta, sei hala’o sorumutu ho Honorável Prezidente Bangladexe nian, Mohammed Shahabuddin, iha Bangabhaban. Líder rua ne’e sei partisipa iha serimónia resepsaun hodi selebra Loron Vitória Bangladesh nian ba dala 54. Serimónia ne’e sei inklui toka hinu nasionál nasaun rua nian, hahú ho Bangladesh nian tuir kedas ho Timor-Leste nian.
Iha loron 17 Dezembru, Prezidente Ramos-Horta sei hato’o palestra públika iha Institutu Estudu Internasionál no Estratéjiku Bangladesh nian (BIISS) kona-ba “Dezafiu ba Pás iha Mundu Kontemporáneu.” Prezidente mós sei hala’o sorumutu iha salaun munisípiu ho estudante no líder juventude sira, hodi fahe ninia esperiénsia sira kona-ba Timor-Leste nia luta ba independénsia, viajen lideransa nian, no aspirasaun nasaun nian hafoin independénsia.
Vizita Estadu dahuluk husi Prezidente Ramos-Horta ba Bangladesh subliña parseria ne’ebé buras daudaun entre Timor-Leste no Bangladesh, partikularmente bainhira Timor-Leste hakbesik ba adezaun tomak ba ASEAN iha tinan 2025-26, hodi loke posibilidade foun ba kooperasaun no diálogu rejionál.
Tuir órariu ne’ebé iha Xefe Estadu nia vizita sei termina iha loron 17 dezembru 2024.
Jornalista: Hortencio Sanchez
Editór : Florencio Miranda Ximenes
