DILI, 17 dezembru 2024 (TATOLI) – Jurista Sergio Quintas konkorda Governu atu halo rekrutamentu ba majistradu estranjeiru atu reforsa no fortifika servisu setór justisa iha Timor-Leste tanba rekursu majistradu judisiáriu iha Timor-Leste seidauk sufisiente atu responde ba servisu hotu iha setór justisa.
Quintas dehan, Governu aprova dekreitu lei ida hodi halo rekrutamntu ba Majistradu Judisiál, Juiz Prokuradór no Defensór Públiku sira estranjeiru atu mai reforsa servisu Justisa iha Timor-Leste ne’e nesesáriu tebes.
¨Problema justisa tenke rezolve fazeadamente, liuliu rekursu umanus ne’ebé mak ohin loron ita seidauk atinje metas ne’ebé ita hakarak, hanesan númeru Juiz, Prokuradór no Defensór Públiku, númeru ne’e seidauk sufisiente, tanba ne’e nesesáriu tebes hodi halo rekrutamentu ba Majistradu Internasionál sira. Ida-ne’e nesesáriu tebes ba polítika Governu nian atu halo rekrutamentu ba Majistradu estranjeiru sira. Majistradu Estranjeiru sira ne’e mai atu fortifika no fortalese sistema ne’ebé maka iha, mai para implementa de’it lei Timor-Leste nian¨, Sergio Quintas hateten ba jornalista sira iha Tribunál Judisiál Primeira Instánsia Dili, Caicoli, tersa ne’e.
Nia esplika, númeru Majistradu Juiz Prokuradór no Defensór Públiku sira sei limitadu no sira mai atu kompleta de’it to’o tempu ida Governu mós haree kondisaun Timor-Leste hamrik ona katak Timor-Leste bele efetivu no efisiente Majistradu estranjeiru sira ne’e tenke fila ona.
¨Ita mós presiza kaer rasik ita-nia justisa rasik no poder soberania iha ita-nia rain rasik mak judisiál labele intervene husi ema estranjeiru. Rekursu umanus sei limitadu tanba ne’e polítika Governu agora ne’e atu fortalese no fortifika de’it setór justisa¨, nia adianta.
Iha biban ne’e, Quintas mós hateten, lei organizasaun Judisiáriu ne’ebé Prezidente Repúblika promulga iha 2023, atualmente, ninia implementasaun seidauk efetivu tanba iha surat tahan de’it.
¨Lei ne’e iha surat tahan de’it, seidauk implementa ho di’ak no espera katak polítika Governu nian ne’ebé maka halo rekrutamentu ba Majistradu sira estranjeiru ne’e, atu kompleta no kria kondisaun ida no to’o tempu ida implementa ona lei refere¨, nia afirma.
Nia esplika, lei ne’e tuir loloos implementa ona atu bele fó justisa efetivu no efisiente ba populasaun sira ne’ebé hela dook husi kapitál nasaun no kapitál munisípiu no sira ne’ebé dook husi postu administrativu sira atu bele asesu justisa.
¨Atu asesu justisa laos konsentra de’it iha kapitál munisípiu no kapitál nasaun, maibé bele lori justisa hakbesik ba iha komunidade¨, nia konklui.
Jornalista: Natalino Costa
