DILI, 17 dezembru 2024 (TATOLI)-Deputadu Parlamentu Nasionál iha loron 17 fulan-dezembru 2024 ne’e, hala’o sesaun plenária ikus ba tinan 2024 nian.
Prezidente Parlamentu Nasionál, Maria Fernanda Lay, espera tinan 2025, deputadu no deputada sira sei servisu ho diak liután hodi dezenvolve Timor-Leste.
“Hahú 20 dezembru ita komesa ona ita-nia ferias ba oin, mas ha’u espera katak, iha adventu ita hirus malu karik, ita bele halo reflesaun para ita hahú tinan foun ho prinsípiu ida di’ak liu mais foku iha serbisu no badinas liu. ida ne’e de’it, no ita sei hetan malu depois tinan foun, bom natal no bom fim do ano ba ita hotu, no felisidade,” nia hateten.
Iha fatin hanesan Deputadu FRETILIN, Antonino Bianco, dehan hanesan ema kristaun iha tempu adventu ema hotu-hotu persiza halo reflesaun ba erru sira ne’ebé halo nu’udar ema no mós hanesan reprezentante povu iha Parlamentu Nasionál durante tinan 2024.
“Aproveita karik durante periódu, ha’u-nia liafuan no hahalok hanesan mós bankada FRETILIN durante halo intervensaun keta la monu laran no la halo tuir aspirasaun povu karik, hein katak Kristu-nia prezensa ne’ebé moris nian,’’ nia hateten.
Jornalista: Nelson de Sousa
Editór: Agapito dos Santos
