DILI, 17 dezembru 2024 (TATOLI) – Seketáriu Estadu Komunikasaun Sosiál (SEKOMS), Expedito Dias Ximenes, enkoraja joven sira atu utiliza plataforma dijitál ho didi’ak atu bele benefisia ba nia aan rasik.
Governante subliña, timoroan barak utiliza ba midia djitál hanesan facebook, youtube, watshapp no seluk tan, to’o aogra utilizasaun seidauk saudavel tanba uza meiu plataforma ba intensaun seluk.
¨Mundu dijitál agora halo ita sem lemite tanba ne’e aproveita oportunidade ida-ne’e ha’u hakarak enkoraja joven sira iha ne’e no estudante sira ne’ebé aproveita dijitalizasaun ida-ne’e ba asaun pozitiva¨, Expedito Dias iha nia intervensaun bainhira sai oradór iha semináriu nasionál ho tema perspetiva sosiedade nian kona-ba dezafiu no oportunidade dezenvolve infraestrutura internet ba transformasaun ekonomia no sosiál iha Timor-Leste¨, ne’ebé mak organiza husi Fundasaun Hadomi Timor ne’ebé realiza iha Universidade IOB Fomento, tersa ne’e.
Nia dehan, hanesan reprezentante Governu koalia kona-ba prespetiva Governu nian oinsa mak atu utiliza espasu dijitál.
¨Tanba ne’e ohin ha’u mai koalia ba joven sira, estudante sira oinsa polítika Governu nian atu bele uza espasu dijitál ne’e ba benefisiu idaidak nian no oinsa benefisiu ba sosiedade aumenta dezenvolvimentu ekonomia familiár¨, nia adianta.
Nia dehan, Governu apoia inisiativa joven sira-nian ba utilizasaun midia oinsa atu hetan benefísiu tanba ne’e Governu kontinua esforsu atu halo kooperasaun ho google no youtube atu estabelese sira-nia servisu iha Timor-Leste no esforsu ida-ne’e kontinua lao.
¨Ita hatene ita-nia joven sira iha kreatividade maibé ladauk hetan oportunidade, ba kooperasaun sira ne’e ita kontinua lao, aleinde ida-ne’e, Governu buka hodi fó hanoin ba joven liuhusi literasia midiátika oinsa enkoraza sira atu uza plataforma dijitál ne’ebé ho saudvel¨, nia afirma.
Expedito Louva ba Fundasaun Hadomi Timor (FHT) ne’ebé organiza semináriu hodi hetan partipasaun husi estudante universitáriu sira atu enkoraza estudante sira importánsia utilizasaun meiu dijitál ne’ebé di’ak no hetan benefisiu.
¨Ha’u agradese ba Fundasaun Hadomi Timor tanba nia apoiu Governu halo bebeik enkontru ho joven sira no enkontru ida-ne’e atu bele sosializa di’ak liután kona-ba meiu dijitálizasaun ho di’ak tanba avansa teknolojia ne’ebé oras ne’e daudaun, se ita la utiliza ho di’ak bele mós estraga ita-nia moris loron loron nian¨, nia dehan.
Iha fatin fatin, Vise Diretór Ezekutiva Ajénsia Teknolojia Informasaun no Komun (TIC-Timor, sigla portuges), Eligio Moniz do Rego, hateten TIC Timor iha hanoin atu reativa fila fali internet saudavel.
¨Ami planu atu reativa fila fali internet saudavel ne’e, para eduka joven sira no estudante sira atu utiliza midia sosiál tuir nia dalan no tuir nia regra sira¨, nia dehan.
Nia dehan, nesesáriu tebes iha tempu sira hanesan ne’e atu enkorja joven sira no estudante sira atu utiliza plataforma dijitál ba benefisiu ne’ebé bele benefisia sira nia aan no ajuda sira atu dezenvolve sira-nia kapasidade no abilidade sira.
Diretór Ezekutivu Fudasaun Hadomi Timor (FDT) Nicho Linnux, hateten semináriu nasionál ne’e halao loron ida no partisipa husi universitáriu hamutuk 120 inklui membru Governu no TIC Timor.
¨Semináriu ida-ne’e importante tebes atu konsiensializa ba ita-nia entidade sira no joven sira atu oinsa uza plataforma midia sosiál tenke tuir regra ne’ebé benefisia ita nia aan¨, nia dehan.
Jornalista: Natalino Costa
Editór : Zezito Silva
