DILI, 19 dezembru 2024 (TATOLI) – Governu reprezenta husi Vise Primeiru-Ministru, Ministru Koordenadór asuntu Ekonómiku no Ministru Turizmu no Ambiente, Francisco Kalbuadi Lay no Diretora Jerál Prezidénsia Repúblika Aida Soares no Asesor Quintilano festeza natal konjuntu ho Prisioneiru hamutuk 420 iha estabelesimentu Prizionál Becora.
¨Sim fatin ida-ne’e oin seluk, iha limitasaun, maibé ba loron boot hanesan natal, hothotu iha direitu atu selebra nudar ema sarani ne’ebé mak fiar ba nain Jesus. Sira iha direitu atu festeza natal¨, Francisco Kalbuadi Lay iha nia intervensaun iha estabelesimentu Prizaun Becora, kinta ne’e.
Lay lori Prezidente Repúblika Jose Ramos Horta no Primeiru-Mininistru Xanana Gusmão nia naran hakarak hato’o votu natal ba prisioneiru sira.
¨Em Primeiru lugar ha’u atu lori Prezidente Repúblika nia naran hamutuk ho Governu liuliu Avo Nana nia naran hanesan Primeiru-Ministru, atan ha’u hamutuk ho Ministru Justisa ho komutiva tomak ne’ebé mak tur iha ne’e mai hato’o boas festa natal ba ita boot sira¨, nia adianta.
Governante ne’e dehan, eventu natal hamutuk ho prizioneriu sira mai husi Prezidente hamutuk ho Governu atu mai fó hanoin no fó domin ba maluk prizioneiru sira tanba la kleur tan sei selebra festa natal.
¨La kleur tan ita komesa tama ona natal, ami iha oportunidade iha meudia ida-ne’e hato’o de’it ba ita boot sira katak hateke ba futuru, ami fiar katak reza hamutuk nai Maromak sei fó loron ida ne’ebé di’ak liu fali ba ita hotu iha loron aban bainrua nian¨, nia informa.
Governante ne’e mós promote sei apoia fasilidade muzikál iha prizaun Becora, atu reklusu sira bele uza hodi bele toka.
Iha fatin hanesan, Ministru Justisa Sergio Hornay hateten, biar ita boot sira iha hela sela laran, ita boot sira nia liberdade limite maibé ita-nia nain Prezidente Repúblika, ita ninian Governu kontinua partilla domin.
¨Imi-nia liberdade limite, maibé imi la mesak, imi lakuran buat ida, Estadu no Governu kontinua ho imi no ami mai akompaña Vise Primeiru-Ministru atu festeza natal hamutuk ho imi tanba lakleur tan ita tama ba ita-nian loron boot hodi simu ita nia belun Jesus Cristo¨, nia dehan.
Nia husu ba rekluzu sira atu iha ámbitu selebrasaun natal no tinan foun ida-ne’e bele halo reflesaun, hadia kualidade hanesan ema hatudu disiplina ne’ebé di’ak atu aban bainrua fila ba família no ba sosiedade bele haluhan tiha sala sira ne’ebé akontese iha tempu sira ne’ebé kotuk.
¨Ita-nia Governu, ita nia Estadu tau importánsia makas ba ita boot sira-nian ezisténsia, biar ita boot sira iha fatin izolamentu ida-ne’e maibé iha mós oportunidade ba ita boot halo interasaun. Hanesan Ministru Justisa ne’ebé mak tau matan ba estabelesimentu Prizionál, ha’u hakarak sauda nafatin ita boot sira primeiru tenke iha kontente nafatin para bele manan pisikolojikamente ita boot sira iha mentál saudavel para hasoru saida mak ita hasoru, segundu ita boot sira hatudu disiplina para bele manan buat sira seluk ne’ebé lei hateten¨, nia haktuir.
Iha ámbitu natal hamutuk Vise-Primeiru-Ministru, Ministru Koordenadór asuntu Ekonómiku no Ministru Turizmu no Ambiente, Francisco Kalbuadi Lay akompaña hosi Ministru Justisa Sergio Hornai no Diretora Jerál Prezidénsia Repúblika Aida Soares no Asesór Quintilano festeza fahe parsela natal ba prizioneiru 420 ne’ebé oras iha estabelesimentu Prizaun Becora.
Jornalista: Natalino Costa
Editór : Zezito Silva
