DILI, 19 dezembru 2024 (TATOLI) – Prezidente Repúblika, José Ramos-Horta no Primeiru-Ministru, Kay Rala Xanana Gusmão, dezeja Natál kmanek ba povu Timor-Leste hotu no husu joven sira kontinua mantein pás.
“Ha’u hamutuk ho Primeiru-Ministru ami nu’udar orgaun Estadu no lider nasionál, hakarak hato’o ami nia votus natál kmanek ba família sira hotu iha Timor-Leste no balun iha rai-liur ne’ebé ba buka moris, ba eskola,” hateten Xefe Estadu hateten iha Palásiu Prezidensiál Dili, kinta ne’e.
Alende ne’e, Ramos-Horta hato’o mós votu Natál ba timoroan hirak ne’ebé moras baixa hela iha Ospitál no balun ne’ebé dadur hela iha Prizaun Becora Dili, Gleno Ermera no Covalima atu forsa nafatin.
“Haku’ak boot ba imi hotu ne’ebé moras iha hela Ospitál, ba imi sira ne’ebé iha Prizaun, forsa nafatin, Natál kmanek no haksolok tinan foun ba imi hotu, fiar katak iha tinan foun sei hetan buat di’ak barak liu,” dehan Xefe Estadu
Xanana husu joven sira kria pás no estabilidade
Entretantu, Primeiru-Ministru, Kay Rala Xanana Gusmão, hato’o mós dezeja Natál kmanek ba povu tomak.
“Hakarak dezeja Natál kmanek ba povu tomak, liuliu ba joven sira, atu kontinua kria pás ba iha ida-idak nia aan atu kontribui ba dezenvolvimentu,” Xanana hateten.
Xefe Governu, iha tinan kotuk joven sira kria ona pás tanba laiha konflitu durante festeza natál no tinan foun. Tanba ne’e joven sira tenke mantein ho pás hanesan tinan kotuk.
“Iha tinan kotuk ita hotu kontente tebes tanba iha periudu natál no tinan foun la akontese buat ida. Ho ida ne’e mak ha’u hanesan Primeiru-Ministru fiar katak joven sira iha Bairru-Bairru ita tenke ka’er tuir mensajen Amu-Papa nian, hosi ne’e imi rasik mak hatudu ba mundu katak pás iha imi joven sira nia liman, iha imi nia ulun no iha imi nia hahalok. Kontinua imi nia pás ne’e iha natál no tinan foun ida ne’e,” nia katak.
Ikus liu, PM Xanana, iha tinan foun mai ne’e, instituisaun Estadu hotu kumpre servisu sira atu hadi’a povu nia moris no lori nasaun ne’e ba oin.
Jornalista: Hortencio Sanchez
Ediór: Florencio Miranda Ximenes
