DILI, 20 dezembru 2024 (TATOLI)—Ministru Prezidénsia Konsellu Ministru, Agio Pereira, sesta ne’e, fó pose ba Anita Tavares Ribeiro hodi asume knaar nu’udar Komisária Komisaun Funsaun Públika (KFP) ba períodu 2024 to’o 2028.
Ministru Agio, hateten, nia parte ohin fó pose tanba KFP tutela ba Ministériu Prezidénsia Konsellu Ministru hodi hala’o funsaun sira.
“Ha’u prezide serimónia ohin nian hodi fó pose ba Komisáriu Funsaun Públika ne’ebé Governu nomea. Ho ida-ne’e, kompozisaun tomak KFP nian restaura ho komisáriu na’in-tolu, inklui Prezidente, nomea husi Governu no Komisáriu na’in-rua ne’ebé eleitu husi Parlamentu Nasionál,” Ministru hateten liuhusi nota ne’ebé Agência Tatoli.
KFP moris ho reforma administrativa ne’ebé implementa husi IV Governu Konstitusionál, iha tinan 2009, ho objetivu atu garante funsaun públika ne’ebé izensaun polítika, imparsiál, bazeia ba méritu no kaer padraun profisionalizmu ne’ebé a’as, ho finalidade atu presta servisu ho kualidade ba Estadu no povu Timor.
“Ida-ne’e konretizasaun vizaun husi Primeiru-Ministru Kay Rala Xanana Gusmão, husi órgaun tékniku ho responsabilidade jestaun rekursu umanu no knaar konsultivu ba Governu kona-ba asuntu sira ne’ebé relevante ba funsaun públika,” nia akresenta.
Tinan 15 hafoin nia kriasaun, KFP agora iha mandatu dahaat, hasoru dezafiu sira ne’ebé programa IX Governu Konstitusionál hamosu. Dezafiu sira ne’e inklui hasa’e efikásia, efisiénsia no profisionalizmu Administrasaun Públika nian ba prestasaun servisu públiku ne’ebé di’ak liu.
Nu’udar fatór krusiál ba implementasaun polítika no programa dezenvolvimentu nian ne’ebé lori ba redusaun pobreza no progresu no bem-estar populasaun.
Governu aprova Planu Reforma Jestaun Rekursu Umanu Administrasaun Públika, ne’ebé iha KFP no Ministériu Finansa nu’udar impursionadór.
“Objetivu sira husi planu reforma nian, destaka estabelesimentu husi estrutura foun ida ba funsaun públika no investimentu ida ne’ebé aumenta iha dezenvolvimentu husi kapitál umanu hodi permite atrai no mantén talentu joven sira ba servisu públika,” governante ne’e dehan.
Foin lalais ne’e, Parlamentu Nasionál aprova lei ida ne’ebé fó autorizasaun ba Governu atu implementa limite idade ba servisu ativu ba funsionáriu públiku sira.
“Regulamentu kona-ba limite idade nian konstitui oportunidade ida ba renovasaun funsaun públika ida-ne’e no ba mudansa ida iha ita-nia funsionáriu públiku sira-nia mentalidade,” Agio dehan.
Paradigma tuan kona-ba funsionáriu públiku nu’udar ema ida ne’ebé restritu atu kumpre regra sira, prosedimentu no oráriu sira presiza troka ho vizaun modernu ida, ne’ebé foka ba rezultadu sira, inovasaun no impaktu reál ba sosiedade.
Mentalidade funsionáriu públiku ohin loron presiza marka ho valór sira hanesan proatividade, empatia no kompromisu ba exelénsia, ne’ebé signifika kompreende nesesidade sira sosiedade no oferese solusaun sira-ne’ebé di’ak no efetivu.
“Atu sai ajente transformasaun, dudu husi étika, transparénsia, responsabilidade no integridade, hodi garante katak asaun ida-idak reflete duni interese públiku loloos.
Komisária Anita Tavares, la’os funsionáriu foun maibé antes ne’e nia asume kargu nu’udar Diretora Rekursu Umanu iha Ministériu Edukasaun no nu’udar mós Diretora iha Sekretariadu KFP. Tanba ne’e, nia hatene didi’ak difikuldade no kompleksidade misaun ne’ebé nia simu ohin loron.
“Ha’u dezeja ksolok no susesu barak ba ita-boot nia knaar nu’udar Komisáriu Funsaun Públika. Ikus liu, ha’u dezeja ba prezidente, komisáriu no funsionáriu sira Komisaun Funsaun Públika nian atu kontinua halo servisu di’ak hodi favorese kualifikasaun no profisionalizmu funsionáriu públiku sira-nian no jestaun di’ak funsaun públika nian, atu nune’e sira fornese servisu di’ak liután ba utilizadór sira no povu Timór,” nia tenik.
Notísia relevante : Governu nomeia Anita Tavares Ribeiro sai Komisária KFP
Komisaria KFP, Anita Tavares Ribeiro de Jesus, agradese tebes ba Ministru Prezidênsia Konsellu Ministru ne’ebé aprova nia kandidatura nu’udar Komisária KFP.
“Ho profunda gratidaun, ha’u hakarak espresa ha’u-nia sentidu agradesementu ba IX Governu Konstitusionál ne’ebé deposita ona konfiansa ida ne’e mai ha’u no ohin atan ha’u hamrik iha fatin ida ne’e hodi simu pose nu’udar Komisária hodi kompleta estrutura KFP,” nia dehan.
Komisária emposada la haluha hato’o ninia profunda agradesimentu ba Prezidente KFP no Komisáriu sira ne’ebé apoiu ona nia kandidatura ba Komisária KFP.
Nia konsiente duni katak nu’udar Komisária nia tenke kumpre plenamente nia responsabilidade ne’ebé tau iha nia kabas hodi fó susesu ba implementasaun programa prioridade KFP nian durante mandatu to’o determina.
“Nu’udar Komisária ha’u komprometida ho ha’u nia prontidaun atu servisu hamutuk ho Prezidente no Komisáriu sira hodi lori KFP ba oin, ho evolusaun tempu iha era globalizasaun iha administrasaun públika fó impaktu ba kompleksidade servisu iha KFP, nune’e ezije servisu ekipa nu’udar sasukat determinante hodi buka solusaun ba problema no dezafiu ne’ebé sei enfrenta. Tanba ne’e mak hau sei dedika hau-nia an atu servisu ho ha’u-nia kapasidade tomak tuir konfiansa ne’ebé ita-boot sira depozita ona mai ha’u,” nia haktuir.
Jornalista : Arminda Fonseca
Editora : Julia Chatarina