KADIN Indonézia prontu servisu ho CCI-TL hodi hasa’e produsaun foos
DILI, 20 dezembru 2024 (TATOLI) – Prezidente Kamara Dagang dan Indústri Indonézia (KADIN), M. Arsjad Rasjid, sesta ne’e, akompaña husi Prezidente Kamara Komérsiu Indústria Timor-Leste (CCI-TL-sigla Portugés), Jorge Serano, hasoru malu ho Prezidente Repúblika, José Ramos-Horta hodi ko’alia kona-ba KADIN Indonézia ne’ebé prontu atu apoiu Timor-Leste hasa’e produsaun foos.
“Ita mak konvida KADIN Indonézia mai para ita atu agradese ba servisu hamutuk durante ne’e, nia mai mós, mai kedan ho projetu lubuk ida ne’ebé planu ba iha futuru nian hanesan oinsa ita ho sira bele servisu hamutuk hodi hasa’e produsaun foos iha ita nia rai laran,” hateten Prezidente CCI-TL, Jorge Serano.
Nia dehan, ba oin CCI-TL ho KADIN Indonézia sei servisu hamutuk oinsa haree ba investimentu bazeia ba akordu ne’ebé asina ona entre parte rua liuliu ba potensialidade sira iha setór produtivu.
“Setór produtivu sira mak ita tenke esplora turizmu, agrikultura, peska, pekuaria no ita tau atensaun mós ba mikro pekena, ne’ebé ita hakarak atu home-industry sira tenke buras, ha’u sempre dehan dalabarak ona katak, ita nia Supermerkadu barak iha ne’e maioria sasan hatama hosi Indonézia, maibé agora ita buka meiu hotu atu sasan balu ita la presiza hatama hosi sira maibé ita mak prodús rasik,” Jorge tenik.
Empreza timoroan ne’e afirma, CCI-TL servisu maka’as hela atu oinsa bele trava osan Timor-Leste nian labele semo bebeik ba liur.
“Ita ladun iha esperiensia kona-ba oinsa halo produsaun ba ai-han sira, maibé ita bele servisu hamutuk ho Indonézia tanba sira iha esperiensia ne’ebé barak, ita asina ona akordu servisu hamutuk haree mós ba buat sira ne’e oinsa hadi’a ita nia ekonomia iha rai laran no dudu setór privadu ba oin,” katak.
Nia dehan tan, “Arsjad hatete ona ita nasaun viziñu sira hakarak ita iha politika ida kona-ba pás no prosperiedade, ita mós simu duni ida ne’e atu kria prosperiedade iha ita nia nasaun. Indonézia nasaun boot, sira nia emprezariu barak tebes, maibé ita buka atu apriende ho sira, maibé tuir realidade ne’ebé ita nia nasaun iha.”
Durante enkontru ho Prezidente Repúblika José Ramos-Horta aseita no hakarak CCI-TL tenke servisu hamutuk ho KADIN Indonézia atu halo investimentu iha Timor-Leste hodi hasa’e ekonomia nasaun nian.
Iha fatin hanesan, Prezidente KADIN M. Arsjad Rasjid hateten, “iha sorumutu ida ne’e, ami hakarak hato’o katak ami asina ona MoU ida horseik entre KADIN ho CCI-TL, no ida ne’e parte ida husi buat ne’ebé importante, atu implementa esforsu kooperasaun ida ne’ebé klean liu tan entre Indonézia ho Timor- Leste, ida ne’e parte ida husi ema ba ema, relasaun negósiu nian”.
Nia subliña, du’urante ho Xefe Estadu Timor-Leste hato’o mós mensajen husi Prezidente Repúblika Indonézia, Parobowo Subianto, kona-ba Timor-Leste nu’udar nasaun viziñu ne’ebé di’ak.
“Nu’udar viziñu ita tenke asegura buat rua, maka pás no prosperidade, iha ne’ebé, ita hakarak hamutuk, prosperidade ne’e pertense ba hamutuk, dame ne’e pertense ba hamutuk, laiha dame la iha prosperidade importante tebes ,” nia dehan.
Tuir nia, daudaun empreza barak, liu-liu empreza estatál Indonézia hosi setór oioin, hola parte hodi haree buat ne’ebé baibain bolu movimentu 08.
“Movimentu 08 ne’e saida, karik ita boot sira hatene katak, 8 ne’e 8% kresimentu ekonomia, zero ne’e oinsa ita atinji 0% pobreza, tanba ne’e dehan katak 08 ita hakarak garante kresimentu ekonomia ekuitativu, tanba ita tenke asegura katak pobreza mós sai zero, no ida ne’e buat ida ne’ebé “Ami fahe tiha ona ho Prezidente uluk,” nia hakotu.
Jornalista: Hortencio Sanchez
Editór: Florencio Miranda Ximenes
