DILI, 23 dezembru 2024 (TATOLI)-Vise-Primeiru-Ministru Asuntu Sosiál no Ministru Dezenvolvimentu Rurál no Abitasaun Komunitária, Mariano Assanami Sabino, akompañadu hosi Ministru Justisa Sergio Hornai, Sekretariu Estadu Komunikasaun Sosiál (SEKOMS) Expedito Dias Ximenes, Prokuradór Jerál Repúblika Alfonso Lopez, Juiza Konselleiru Tribunál Rekursu Maria Natercia inklui autór judisiariu balun despede kandidatu majistradu na’in-24 ne’ebé sei arranka ba Portugal hodi kontinua sira-nia estudu iha Sentru Formasaun Jurídiku Lisboa, Portugal.
Majistradu sira ne’e kompostu husi kandidatu Juís na’in-13, kandidatu Ministériu Públiku na’in hitu no kandidatu Defensór Públiku na’in haat. Kandidatu Majistradu sira ne’e, antes ne’e, konklui ona sira-nia formasaun VII ba Juíz, ba Ministériu Públiku no Defensoria Públiku iha 2023 no halo ona sira-nia prátika ba Juíz iha Tribunál Judisiál Primeira Instánsia Dili, Prokuradória Jerál Repúblika no Defensoria Públika.
Maibé, ih 2024 Governu da-sia liuhusi desizaun Konsellu-Ministru, dekretu-lei númeru 28/2024 hodi halo tiha alterasaun dahuluk ba VII kursu Majistratura Judisiáriu, Majistradu Ministériu Públiku no Defensoria Publika hodi haruka tan kandidatu majistratura judisiáriu VII kursu ba kontinua sira-nia formasaun komplementar iha estudu área jurídiku nian iha Portugal.
Kandidatu majistradu judisiáriu na’in-24 ne’e balun sei arranka iha loron 27 fulan-dezembru no balun sei arranka iha loron 28 fulan-dezembru tinan ne’e ho nune’e segunda (23/12) ohin Governu halo despedida ba kandidatu majistradu 24 ne’ebé sei kontinua estudu iha nasaun membru diretu plenu organizasaun luzófona, CPLP ne’e.
Vise-Primeiru-Ministru Asuntu Sosiál no Ministru Dezenvolvimentu Rurál no Abitasaun Komunitária, Mariano Assanami Sabino, husu ba kandidatu majistratura judisiáriu na’in-24 ne’e atu aproveita oportunidade ne’ebé sira hetan ne’e atu estuda halo didi’ak estuda ho fuan ho laran nune’e bele fila bele reforsa servisu setór judisiáriu iha Timor-Leste.
“Agora dadaun Nuno Governu mai ho vizaun klaru, reforma justisa ne’e presiza la’o duni hodi haforsa servisu ita-nia setór justisa. Governu nia komitementu mak ne’e atu hadi’a setór justisa hodi bele fó justisa ne’ebé adekuadu ba ita-nia sidadaun sira”.
“Poltikamente ami sei apoiu no iha Konsellu ami sei haree para buat ne’e ita-nia setór justisa hamutuk itabele mellora ba oin,” Mariano Assanami hateten iha nia intervensaun bainhira partisipa serimónia despedida ba kandidatu Majistradu Judisiáriu na’in-24 ne’ebé atu kontinua sira-nia formasaun durante tinan ida iha Portugal, iha auditoria Ministériu Justisa, Colmera segunda ohin.
Autoridade ezekutiva timoroan ne’e kongratula kandidatu majistratura judisiáriu na’in-24.
¨Parabéns ba ita-boot sira! Bom estudu! Estuda didi’ak atu imi mai bele kontribui ba ita-nia nasaun liuliu setór justisa,” nia afirma.
Nune’e mós Ministru Justisa, Sergio Hornai husu ba kandidatu Majistradu sira atu hatudu patriotizmu no nasionalizmu durante halo estudu iha Portugal hodi bele mai servi fali Timor-Leste liuhusi abilidade no espesialidade ne’ebé iha.
¨Ha’u hanoin katak língua sai difikudade iha imi-nia estudu ida-ne’e maibé ha’u fiar ho ita-boot sira. Ha’u fiar katak ita-boot sira bele finaliza ita-boot sira-nia estudu ho di’ak,” nia otimisita.
Nunee mos Xefe Ekipa Traballu ba reforma justisa Lucia Lobato dezafia kandidatu majistradu judisiáriu VII Kursu formasaun na’in-24 ne’ebé mak hetan oportunidade ba kontinua formasaun judisiária iha Portugal atu hatudu disiplina hodi konklui formasaun ne’e ho di’ak.
Jornalista: Natalino Costa
Editór: Rafael Ximenes de A. Belo
