DILI, 26 dezembru 2024 (TATOLI) – Komandante Polísia Nasionál Timor-Leste (PNTL), Munisípiu Dili, Superintendente Xefe Polísia Orlando Gomes, husu ba joven sira atu matein pás no estabilidade iha ámbitu selebrasaun tinan foun.
¨Husu ba joven sira tomak, ita bele festeza loron natal no tinan foun mai, ita nafatin matein disiplina, ita nafatin rona autoridade seguransa sira, rona autoridade komunitáriu sira atu ita hotu hotu hamutuk atu bele kria situasaun ka ambiente seguransa ne’ebé di’ak atu nunee atu ita festeza tinan foun ne’ebé mak mai nee ho di’ak¨, Superintendente Xefe Polísia Orlando Gomes, hateten ba jornalista sira iha nia knar fatin Komandu PNTL Eskudra Dom Aleixo, Comoro, kinta, ohin.
Orlando afirma, iha ema ruma mak hakarak kria konflitu, komandu operasaun konjunta sei latolera ba hahalok krime sira.
¨Komandu husu nafatin atu di’ak liu koopera ho seguransa ho operasaun konjuntu para ita hotu hamutuk hodi garante situasaun seguransa festeza ba tinan foun ne’ebé mak atu mai¨, nia adianta.
Nia dehan, Komandu sei hasae patrollamentu sei koloka mós membru sira iha terenu para asegura movimentu komunidade ninia atu festeza loron tinan foun dia 31 ho dia 1 janeiru 2025.
¨Ita simu ona orientasaun husi Komandu konjuntu atu servisu makas liu para ba oin ita halo prevensaun ba atus krime sira ne’ebé mak mosu¨, nia konklui.
Jornalista: Natalino Costa
Editór : Zezito Silva
