BAUCAU, 26 dezembru 2024 (TATOLI) – Komandu Polísia Nasionál Timor-Leste (PNTL) munisípiu Baucau husu ba joven sira atu evita konsumu alkol iha fatin públiku.
Komandante PNTL Munisípiu Baucau, Superintendente Xefe António Maria de Sá, louva ho maturidade joven sira iha Baucau tanba durante selebrasaun loron Natál kria pas no dame.
‘’Komandu husu atu joven sira kontinua mantein disiplina, labele hemu arbiru. Hakarak hemu entaun iha uma nune’e lanu deskansa nune’e labele hamosu disturbiu orden públiku,” Komandante PNTL Munisípiu Baucau hateten iha Vila Nova, kinta ne’e.
De Sá rekoñese iha duni joven sira konsumu alkol iha estrada públiku maibé provizoriumente durante selebrasaun Natál la rejista kazu insidente no asidente ruma.
Komandu kontinua apela atu labele halibur malu no konsumu alkol iha dalan públiku inklui respeita prezepiu tanba konsideradu nu’udar fatin sagradu nune’e presiza valoriza.
Antes hasoru loron Natál no tinan foun, Komandu PNTL Baucau halo medida prevensaun hanesan halo diálogu komunitária ho líder suku, veteranu no líder organizasaun arte-marsiál inklui komunidade iha kada suku hodi sosializa kona-ba maneira prevensaun konflitu sira ho lei arma branka, rezolusaun organizasaun arte-marsiál no kódigu estrada.
Nune’e mós estabelese Konsellu Seguransa Munisipál lideradu Prezidente Autóridade Munisipál (PAM) ne’ebé kolabora ho autoridade postu no suku ho objetivu kria pas no estabilidade iha territóriu Baucau.
“Ita kontinua sensibiliza ita-nia joven sira atu hotu-hotu sai autór ba pas no estabilidade, ida-ne’e mak ita-nia esperansa,” Superintendente Xefe De Sá akresenta.
PNTL kontinua apela ba joven sira sei la tolera kualkér maneira konflitu ne’ebé hamosu destabilidade iha Baucau nune’e forsa konjunta kontinua halo opersaun konjunta iha área jurídiku Baucau.
Forsa konjunta rasik kompostu husi PNTL, F-FDTL komponente terrestre inklui Batallaun Orden Públiku (BOP) ne’ebé aplika medida prevensaun.
PNTL Baucau durante loron Natál liuhusi seksaun tránzitu halo apreensun ba motorizada hamutuk 23 no mikrolete rua ne’ebé konsideradu kontra kódigu estrada hanesan la utiliza kapaste, laiha dokumentu no kontra sinál tránzitu.
Notísia relevante: Karreta ofisiál F-FDTL hetan tuda iha Bercoli
Jornalista : Natalino Belo
Editór . : Evaristo Soares Martins
