DILI, 27 dezembru 2024 (TATOLI) – Ministériu Juventude, Desportu, Arte no Kultura (MJDAK), liuhusi Sekretáriu Estadu Arte no Kultura (SEAK), Jorge Soares Cristovão, hamutuk ho Komisáriu Anti Korrupsaun (KAK), Rui Pereira dos Santos, hala’o lansamentu livru Estudu Avaliasaun Risku Korrupsaun ba Implementasaun Subvensaun Publika.
Lansamentu ne’e ofisialmente loke husi Sekretáriu Estadu, Jorge Soares Cristovão, iha salaun magna MJDAK Lecidere Dili, kinta ne’e.
Bainhira abertura, Jorge Soares Cristovão hateten, livru estudu ne’e hanesan referénsia importante atu hadi’a implementasaun subvensaun públika iha área Juventude, Desportu, Arte, no Kultura.
“Líderansa setór sira atu uza livru ida ne’e ho prudente no responsabilidade hodi promove jestaun efetivu no transparénsia,” Jorge hateten.
Iha fatin hanesan, Komisáriu KAK, Rui Pereira dos Santos, hato’o agradesimentu ba MJDAK nia kolaborasaun, no esklarese katak estudu ida ne’e halo kontinuamente hodi identifika no mitiga risku korrupsaun iha utilizasaun orsamentu públiku.
“Ministériu sira hotu atu reforsa monitorizasaun no verifika dokumentasaun proposta sira hodi asegura transparénsia,” Rui tenik.
Lansamentu livru ne’e hatudu komprimisiu entre MJDAK no KAK atu prevene korrupsaun no promova justisa iha distribusaun benefísiu públiku.
Jornalista: Hortencio Sanchez
Editór: Florencio Miranda Ximenes
