DILI, 30 dezembru 2024 (TATOLI)- Komandante Polísia Nasionál (PNTL) Munisípiu Dili, Superintendente Xefe Polísia Orlando Gomes, lidera enkontru Konsellu Seguransa Munisipál Dili hodi husu entidade hothotu iha Munisípiu Dili atu garante situasaun hakmatek iha ámbitu selebrasaun misa ba 31 dezembru kalan no misa ba loron 1 janeiru tinan foun-2025.
Nia dehan, Komandu Munisípiu Dili trasa ona planu operasaun ba dia 31 no dia 1 maibé presiza halo kordenasaun di’ak ho Unidade Espesiál Polísia (UEP), Polísia Marítima no Forsa amigu F-FDTL atu apoiu tan Munisípiu Dili nune’e bele garante situasaun di’ak.
“Komandu Munisípiu Dili ohin realiza enkontru ida atu koordena ho Xefe Suku, Xefe Aldeia ho ita-nia veteranu sira ho joven sira. Hamutuk ita hotu atu halo situasaun ne’e kalma iha dia 31 ho dia 1 janeiru. Ita-nia esforsu tomak mak ne’e, servisu hamutuk ho sira para ita hothotu garante situasaun seguransa ne’ebé mak di’ak,¨ Superintendente Xefe Polísia Orlando Gomes hateten ba jornalista sira hafoin partisipa reuniaun Konsellu Seguransa Munisipál Dili, iha Eskuadra Dom Aleixo segunda, ohin.
Autoridade polisiál ne’e hateten, Munisípiu Dili sempre mosu konflitu hanesan foin daudaun iha dia 24 dia 25 no fatin ne’ebé mosu konflitu ne’e Komandu identifika ona no Komandu sei koloka tan membru atu reforsa tan seguransa ba fatin sira ne’ebé Komandu identifika ona.
“Ita identifika ona, sei koloka tan membru sira iha ne’ebá para nune’e iha dia 31 kalan ne’e sira bele halo movimentu, patrullamentu la’o ain área ida ne’ebé mosu konflitu,” nia adianta.
Nia afirma, Postu Administrativu Dom Aleixo iha fatin haat mak konsidera nu’udar fatin risku ba konflitu tanba ne’e mak Komandu sei koloka membru PNTL iha fatin sira ne’e para bele kontrola movimentu sidadaun sira-nian.
“Ha’u labele fó sai fatin sira ne’e tanba tátika Komandu nian maibé ita sei koloka membru sira dia 31 ba zona risku konflitu sira ne’e atu bele halo intervensaun ba kualker konflitu ne’ebé mak mosu iha ne’ebá,” nia dehan.
Evita hemu tua iha dalan públiku
Komandante Munisípiu ne’e fó hanoin ba joven sira atu evita hemu tua iha dalan públiku no halibur malu iha dalan públiku durante selebrasaun tinan foun kuandu joven sira viola mak PNTL sei halo atuasaun.
Nia dehan hakarak halibur malu no hemu tua tenke iha idaidak nia uma, labele iha dalan públiku ne’e Polísia sei atua
“Kuandu ida nee mak mosu entaun Komandu Munisípiu Dili halo atuasaun ba sira-nia hahalok ne’e tanba ita hatene katak mosu komflitu ne’e maioria husi konsumu álkool ida-ne’e mak ita deteta,¨ nia sublina.
Komandante PNTL Munisípiu Dili ne’e fundamenta katak sei koloka membru sira iha tasi-ibun hanesan Cristo Rei durante komunidade sira pasa tempu.
¨Ita se’i koloka ita-nia membru sira iha ne’ebá, koloka tranzitu iha nee6ba para atu kontrola movimentu transporte iha ne’ebá para ita-nia sidadaun sira labele kontra lei Kódigu Estrada. Sira tenke nafatin kumpre regra Tranzitu. Ita se’i koloka membru tranzitu atu nun6ee halo check point iha fatin ne’ebá para bele kontrola ita-nia movimentu para sira-nia pasa tempu bele la’o di’ak labele hetan asidente ruma,” nia konklui.
Jornalista: Natalino Costa
Editór: Rafael Ximenes de A. Belo
