DILI, 06 janeiru 2025 (TATOLI)—Kooperativa Multisetoriál Haguan Haburas Agríkola Cocoa, ne’ebé foka ba área tolu hanesan pekuária, rai no empresta osan (kréditu) inklui agríkola, eziste hodi akomoda agrikultór nia moris.
“Grupu kooperativa multisetoriál Haburas Agríkola ne’ebé ami harii bazeia ba moris agrikultór ninian, ho objetivu atu halo mudansa ba komunidade nia moris hodi kontribui ba dezenvolvimentu nasaun ninia,” Prezidente Kooperativa Multisetorál Haguan Haburas Agríkola Cocoa, Gabriel Madeira Carvalho, informa ba Agência Tatoli, iha ninia knaar fatin, iha postu administrativu Railaco, munisípiu Ermera, domingu (05/01).
Razaun atu halo mudansa ba komunidade nia moris tanba haree ba situasaun agora joven barak mak bá buka serbisu iha ema-nia rai.
“Entaun tenke hanoin ona hotu-hotu labele bá hotu rai-li’ur, maibé iha rai-laran mós bele halo serbisu ne’ebé simples hanesan kuda produtu ruma no fa’an fali bá merkadu hodi hetan osan suporta nesesidade família ninian,” nia akresenta.
Notísia relevante : SEKoop enkoraja Federasaun Multi Kooperativa Wekeke hodi hasa’e produsaun agrikola
Jerente kooperativa dehan, atu kontribui ba dezenvolvimentu la presiza loke empreza boot maibé liuhusi atividade kria kooperativa no halo negósiu.
“Tanba serbisu saida de’it ita halo ho fuan, la hein Estadu ka Governu haruka mak ita halo, hanoin ida-ne’e mós kontribui ona tanba ita bele loke rasik kampu traballu ba ita-nia an no maluk sira seluk,” nia hato’o.
Atividade kréditu iha kooperativa ne’e, ninian osan mai husi membru 23, ne’ebé kada membru mensalmente hatama osan $35 no osan mai husi fa’an baunila, ikan no kuda modo.
“Hahú husi tinan 2020 to’o agora ami rai ona osan iha kooperativa hamutuk $1.686, baibain ita fó empresta ne’e ba membru kooperativa sira $100 ho nia juru 2%, enkuantu ba ema seluk 5%,” Gabriel Madeira relata.
Atividade pekuária iha kooperativa ne’e, ikan sira ne’ebé hakiak daudaun iha kolam haat, ne’ebé fa’an ba komunidade no membru kooperativa sira.
“Ikan ne’ebé ami hakiak ne’e seidauk bele fa’an bá merkadu tanba haree ba bokur ikan nian seidauk bele, tanba ami fó han de’it hahán tradisionál, la’ós fó hahán loja nian hanesan pelet ne’ebé halo ikan bokur,” nia katak.
Antes ne’e kooperativa hetan apoiu fundu balun husi Prezidente Repúblika, José Ramos Horta hodi harii kolam ikan. Tuir planu membru sira atu harii tan kolam 10 ba ikan, tradisionál nian haat no modernu neen.
“Daudaun ami mós haruka tan ona pedidu bá Prezidente Repúblika atu apoia ami iha parte tolu hanesan mákina produsaun pelet ikan nian atu ami prodús rasik pelet ba ikan nian, hodi fó han ikan no fa’an pelet, mákina printer nian atu fasilita ami-nia serbisu no brankas osan nian para tau osan kooperativa nian, espera pedidu sira ne’e bele hetan resposta husi ita-nia Prezidente Repúblika,” nia tenik.
Maski nune’e, kooperativa ne’e sei nafatin hasoru difikuldade hanesan falta formasaun iha parte sistema tranzasaun osan ba sistema ninian tanba agora la’o ho sistema maibé formasaun seidauk másimu.
“Formasaun sira ne’e ami hetan ne’e maihusi Institutu Apoiu Dezenvolvimentu Emprezariál (IADE) inklui ajénsia internasionál balun fó kona-ba formasaun lideransa, negósiu no literasia finanseiru inklui negósiu agronomia ninian hanesan kuda baunila no seluk tan,” nia salienta.
Biban ne’e, Prezidente kooperativa husu ba Governu atu tau importánsia nafatin ba kooperativa foun sira ne’ebé foin harii nune’e sira mós bele kontribui ba dezenvolvimentu nasaun.
Jornalista : Arminda Fonseca
Editora : Julia Chatarina