DILI, 06 janeiru 2025 (TATOLI)– Governu liuhusi Ministériu Juventude, Desportu, Arte no Kultura (MJDAK) apoiu rihun $36 ba Komite Paralímpiku Nasionál Timor-Leste (CPNTL-sigla portugés) hodi realiza eventu Festivál Nasionál Desportu Paralímpiku (FNDP) 2025.
Atividade ne’e realiza iha Jináziu Dili durante loron tolu hahú 06-08 janeiru.
Biban ne’e,Ministru Juventude, Desportu, Arte no Kultura (MJDAK), Nelyo Isaac Sarmento, hateten, Governu hakarak tebes atu apoiu duni atleta sira ne’ebé ho kondisaun difisiente.
“Governu ida ne’e iha interese tebes atu fó apoiu ba atleta difisiente sira, ida ne’e mak ita apoiu osan hamutuk rihun $36 hodi sira hala’o atividade ne’e hodi buka mós fini ba atleta ho kondisaun difisiente sira hodi bele ba kompete mós iha eventu internasionál sira,” Ministru Nelyo hateten bainhira halo abertura ba FNDP iha Jinaziu Dili, segunda ne’e.
Ministru ne’e dehan tan, “Ita iha atleta difisiente sira, maibé atividade ba ema ho difisiente sira menus tebes, liuliu iha desportu ne’e. Tinan ida ne’e ita atu buka atleta ema ho difisiente foun tanba ita konta ho sira atu dezenvolve ita nia modalidade desportiva iha nasaun ida ne’e”.
Iha okaziaun ne’e, Governante ne’e kontinua enkoraja atleta ho kondisaun difisiente sira hotu iha Timor-Leste atu hatudu nafatin talentu ne’ebé iha no hariku kapasidade iha atividade desportiva.
“Ha’u nia mensajen ba atleta difisiente sira hotu, nafatin hatudu imi nia talentu tuir imi nia kapasidade, imi sei la mesak Governu sei iha imi nia kotuk, rai ida ne’e imi sira ne’e nian hotu, entaun imi tenke kontribui tuir saida mak imi bele, Governu apoiu nafatin imi, agora ami buka meiu hela atu apoiu fasilidade ba ita-boot sira, tanba atleta barak ona maibé fasilidade mak sei menus tebes, ida ne’e Governu la taka matan, tinan ida ne’e ami sei resolve,” Governante ne’e kompromete.
Governu sei servisu maka’as ho CPNTL iha nasionál no Munisipiu atu kria atividade kada tinan atu bele fó esperansa ba atleta difisiente sira.
CPNTL agradese Governu
Iha fatin hanesan, Prezidente Komisaun Organizadór ba eventu FNDP, Joãozinho Fereira, hato’o agradese ba MJDAK ne’ebé hola inisiativa di’ak hodi apoiu ona CPNTL realiza atividade ne’e.
“Ita agradese tebes ba Governu liuliu MJDAK ne’ebé apoiu ona orsamentu mai ita hodi realiza atividade ida ne’e, festivál ida ne’e hanesan kriteria ida hodi halo selesaun nasionál atu prepara atleta sira ne’ebé iha prestasaun hodi bele kompete iha eventu internasionál sira,” nia hateten.
Nia hatutan, atleta hirak ne’ebé kompete iha atividade ne’e mai husi Munisipiu 11 la inklui Munisipiu rua hanesan Manufahi no Ainaro.
Total atleta ne’ebé partisia iha eventu ne’e hamutuk 100-resin mai husi modalidade lima mak hanesan, Badminton, Atletizmu, Xadres, Hiit-besi no Tenis Meza. Enkuantu premiu ne’ebé komisaun prepara ona ba atleta manán na’in sira mka hanesan osan no sertifikadu apresiasaun.
Jornalista: Hortencio Sanchez
Editor: Florencio Miranda Ximenes
