DILI, 06 janeiru 2025 (TATOLI)–Ministru Obra Públika (MOP), Samuel Marçal, husu ba populasaun atu labele konstrui uma iha área risku dezastre hanean mota ninin, foho lolon sira atu labele fó impaktu hodi ba inundasaun iha kapitál Dili no evita risku ba dezastre naturál.
“Ita fó ona ganti rugi ba sira, husu atu komunidade labele halo uma iha fatin risku sira. La’ós de’it ba populasaun hela besik mota, iha parte rai-hun sira-ne’ebé monu ne’e mós husu atu labele konstrui uma hodi hela ba,” Governante ne’e apela ba populasaun, iha Fomento II.
Nia husu mós ba populasaun ne’ebé hetan ona kompensasaun atu labele halo uma iha foho leten sira atu fó risku inundasaun iha kapitál Dili iha tempu udan.
“Aproveita iha mídia ne’e, sobu husi ne’e labele ba sae ba foho leten, tanba imi sa’e ba foho leten, imi kee rai iha leten ne’ebá, udan been lori tun mai, tama ba baleta sira-ne’e hotu nakonu fali ba Dili laran no sobu hotu fila-fali obra sira,” nia apela.
Tuir nia, ida-ne’e responsabilidade ema hotu nian tanba ba nasaun Timor-Leste ne’e responsabilidade timoroan hotu ninian no presiza ema hotu nia kontribuisaun.
“Ita sobu iha ne’e, imi sa’e fali ba foho lolon, ne’e fila fali de’it, udan mai tama fali ba Dili laran no valeta intupidu hotu. (Ita) lahatene osan atu halo eskola, saúde no ponte, maibé halo buat sira ne’e,” nia husu.
Governante ne’e dehan, ba populasaun sira-ne’ebé hetan ona despezu administrativu no hetan ona rekompensasaun iha lista baze dadus ministériu nian.
Jornalista : Jesuína Xavier
Editór : Cancio Ximenes
