iklan

HEADLINE, SEGURANSA

PNTL detein suspeitu na’in-tolu envolve rouba motor iha Balide 

PNTL detein suspeitu na’in-tolu envolve rouba motor iha Balide 

Logotipu PNTL

DILI, 08 janeiru 2025 (TATOLI) – Xefe Departamentu Investigasaun Kriminál (DIK), Superintendente Polísia João Belo dos Reis hateten, PNTL detein suspeitu na’in-tolu ne’ebé envolve naok motor iha igreja Balide iha natal tinan kotuk.

Suspeitu na’in-tolu ne’ebé PNTL detein ho inisiál JMS, JMM no  SX.

João Belo rekorda katak suspeitu na’in-tolu ne’e polísia detein tanba foti subar vítima X nia motor iha igreja Balide bainhira vítima referida para hela nia motor iha igreja Balide nia oin hodi tuir hela misa 24 dezembru 2024 kalan. Bainhira motorizada vítima nian para hela igreja oin, suspeitu JMS hamutuk ho suspeitu rua seluk JMM no  SX foti subar tiha vítima nia motor.

Vítima hato’o keixa mai PNTL no iha 7 janeiru  2025, horseik, oras tuku 14:00 loraik, PNTL liuhosi Servisu Informasaun Polísia buka tuir kedan motor ne’ebé lakon no konsege deteta movimentu suspeitu iha area Taibesi merkadu no servisu informasaun polísia halo kedan intervensaun hodi kaptura suspeitu na’in-tolu ho evidénsia matorizada Honda Beat ho xapa matríkula P 1101 TL hodi entrega ba servisu investigsaun polísia.

¨Agora daudaun, depoizde halo tiha identifikasaun horikalan  ba suspeitu sira, ita halo detensaun kedan sira iha sela Komandu Munisípiu Dili no ami aprezenta ba  kedan iha Ministériu Públiku no kazu ne’e rejistu ho númeru NUC 0012/2025- PNSIK¨, João Belo hateten ba jornalista sira iha nia kna’ar fatin kuarta, ohin.

Nia dehan, polísia asegra uluk suspeitu JMS, hafoin ida-ne’e mak ba asegura tan suspeitu nain rua seluk.

¨Supeitu sira ne’e balun foin halo asaun naok maibé iha balun ne’e prátika asaun, ne’e bebeik ona, sira ne’e hola parte krime organizadu¨, nia informa.

Nia dehan, PNTL identifika ona suspeitu sira ne’e nia grupu.

¨Sira-nia grupu nia naran ha’u labele fóo, maibé hakarak informa ba públiku katak Polísia Nasionál Timor-Leste liuhusi servisu informasaun, ita kontinua buka tuir suspeitu sira ne’e. Ita la fo fatin ba suspeitu sira ne’ebé mak prátika krime organizadu sira ne’e atu halo asaun krime naok ema nia sasan iha Dili laran, tantu iha mós munisípiu sira¨, nia akonklui.

Jornalista: Natalino Costa

Editór : Zezito Silva

iklan
iklan

Leave a Reply

iklan
error: Content is protected !!