DILI, 09 janeiru 2025 (TATOLI)–Governu liuhusi Sekretariu Estadu Desentralizasaun Lokál, Mateus dos Santos Tallo no Prezidente Autoridade Munisipal Dili, Gregório Saldanha, kinta (09/01) ne’e, inaugura edifisiu ba servisu agrikultura munisipiu Dili iha Becora.
“Kompañia konsege finaliza obra edifisu Agrikultura munisipiu Dili nian. Ha’u hanoin pasu importante ida ba munisipiu Dili atu hakbesik liután sira-nia servisu ho grupu Agrikultura sira iha munisipiu Dili ba asuntu agrikultura, peska no floresta. Ida-ne’e, hanesan mahon ida ba sira hodi hala’o servisu atu fasilita dialogue ho ita grupu agrikultura, peska no floresta iha Díli,” governante ne’e hateten ba jornaslista sira iha Becora, kinta ne’e.
Tuir nia, ida-ne’e kompeténsia ne’ebé atribui husi Dekretu-Lei Nú. 84/2023, tanba ne’e edifisu ne’e mós hanesan pasu ida oinsá kompleta instrumentu ba sesentralizasaun poder lokál.
Iha fatin hanesan, Prezidente Autoridade Munisípiu Dili, Gregório Saldanha, husu ba diretór sira atu servisu hamutuk ho agrikultór sira atu kuda buat ruma iha rai ne’e.
“Edifisu ida-ne’e faze foun ida ba servisu munisipál ba diresaun agrikultura, floresta no seguransa alimentar. Ha’u husu atu organiza ita-nia agrikultór sira atu labele husik rai mamuk, maibé rai tenke kuda buat ruma,” nia dehan.
Polítika munisipiu Dili nian mak tenke kuda buat ruma hanesan kuda ai ne’ebé iha valór ekonómiku no aí sira-ne’ebé bele kondis ho rai atu kuda.
Atoridade Minisípiu Dili (AMD) ne’e sujere atu agrikultór ka populasaun kuda ai-kasia, ai-kaixote, au no ai-fuan sira seluk.
Diretora Empreza GAERENEZ UNI. LDA, Delia de Jesus Araújo, hateten kompañia halo konstrusaun iha fulan tolu nia laran ho orsamentu rihun $169.
Jornalista : Jesuína Xavier
Editór : Cancio Ximenes
