DILI, 13 janeiru 2025 (TATOLI) – Primeiru-Ministru Xanana Gusmao husu ba Polísia Nasionál Timor-Leste (PNTL) hodi halo investigasaun klean ba kazu ema deskoñesidu tiru antigu Prezidente Repúblika, Francisco Guterres Lu Olo, iha kuarta (1/1) foin lalais ne’e.
Tuir Xefe Governu katak kazu ne’e polísia presiza halo investigasaun ne’ebé profunda atu bele hatene motivu husi kazu ne’e loloos.
¨Polísia tenke ser halo investigasaun klean tanba ha’u nia problema mak ne’e, kilat musan sae to’o lalehan, fura uma ida ba to’o hakanek fali labarik ida toba hela iha kama laran ne’e. Ida-ne’e halo ita mós sente katak buat ne’e tebes ka lae. Bala ida-ne’e bala espesiál, mas bala hanesan ne’e ha’u sente Ukraina mak hetan bala espesiál hanesan ne’e hodi manan tiha funu, maibé to’o agora sira funu hela de’it. Ne’ebé, sim, presiza investigsaun¨, Xefe Ezekutivu dehan ba jornalista sira hafoin enkontru ho Komandante Jerál PNTL Komisáriu Jerál Polísia, Henrique da Costa no segundu Komandante Jerál PNTL Komisáriu Polísia Pedro Belo iha nia knaar fatin Kuartel Jerál PNTL Caicoli, Segunda, ohin.
Iha fatin hanesan, Komandante Jerál Polísia Nasionál Timor-Leste (PNTL), Komisáriu Jerál Polísia Henrique da Costa, hateten ba kazu ne’e PNTL kontinua halo investiasaun ne’ebé klean.
Komandante Jerál PNTL ne’e hateten, PNTL komunika ona ho Polísia Federl Austrália hodi tulun PNTL atu halo ezame balástiku ba bala musan ne’ebé polísia hetan iha rezidénsia antigu Prezidente Repúblika, Francisco Guterres Lu-Olo.
¨Prosesu ida-ne’e, la’os prosesu baibain, ida-ne’e ita halo ona komunikasaun parseria husi Polísia Federál Austrália (AFP, sigla ingles) para nune’e sira bele ajuda ita hodi halo teste laboratóriu ba bala musan ne’ebé mak ita hetan, lakleur tan iha tempu badak nia laran sira sei mai para atu apoiu ita-nia investigadór sira hodi halo ida-ne’e¨, nia afirma.
Nia dehan, bala musan ne’ebé PNTL hetan iha rezidénsia Lu Olo nian iha Farol entrega ona ba Minsitériu Públiku nudar objetu ka evidénsia ne’ebé momentu PNTL rekolla iha fatin akontesimentu.
¨Maibé ita sei presiza halo klean liután kazu ida-ne’e¨, nia konklui.
Jornalista: Natalino Costa
Editór : Zezito Silva