iklan

HEADLINE, SEGURANSA

Xanana lamenta timoroan lori kilat musan tama iha fronteira Batugade

Xanana lamenta timoroan lori kilat musan tama iha fronteira Batugade

Primeiru-Ministru, Kay Rala Xanana Gusmão, hala'o vizita kortezia ba kuarter jerál PNTL Caicoli Dili, segunda (13/01). Imajen Tatoli/Egas Cristovão.

DILI, 13 janeiru 2025 (TATOLI) – Primeiru-Ministru Xanana Gusmao, lamenta ho hahalok  sidadaun timoroan balun ne’ebé lori kilat musan tama mai iha fronteira Batugade.

Atitude ida-ne’e, Xefe Governu, segunda (13/1) ne’e, halo vizita derepente ida ba Kuartel Jerál PNTL hodi fó xamada ba Komandu Polísia Nasionál Timor-Leste atu reforsa servisu seguransa iha fronteira.

¨Ohin mai vizita Komandu Jerál Polísia Nasionál Timor-Leste tanba iha fronteira foin daudaun timoroan balun hatama mai ho kilat musan. Buat sira ne’e hotu, ida-ne’e seguransa Estadu nian, Tamba ne’e mak ha’u mai iha ne’e laos hanesan apresia, maibé ita fó atensaun de’it atu kontinua nafatin seguransa Estadu nian ne’e importante tebes. Tanba ha’u mai ne’e atu kontaktu komandu PNTL atu reforsa nafatin servisu iha fronteira atu garante seguransa iha ita-nian rain¨, Xanana Gusmao hateten ba jornalista sira hafoin enkontru ho Komandante Jerál PNTL Komisáriu Jerál Polísia Henrique da Costa no Segundu Komandante Jerál PNTL Komisáriu Polísia Pedro Belo iha nia knaar fatin Kuartel Jerál PNTL Caicoli, Segunda, ohin.

Xefe Governu ne’e husu ba Komandu PNTL atu tau atensaun sériu ba asuntu ne’e hodi fortifika seguransa iha liña fronteira liuliu pontu entrada sira atu nune’e ema labele naran lori kilat musan tama no sai iha pontu entrada sira.

Iha fatin hanesan, Komandante Jerál PNTL, Komisáriu Jerál Polísia Henrique da Costa, hateten los duni katak iha domingu horseik sidadaun timoroan ida lori kilat musan tama mai fronteira Batugade hafoin partisipa serimónia funebre família nian iha NTT Indonézia.

¨Los duni horseik loraik, ita hetan informasaun servisu sira iha fronteira katak joven timoroan ida husi Indonézia tama mai fronteira Batugade. Joven ne’e ba Indonézia ba tuir funebre ninia família iha NTT Indonézia bainhira nia fila mai, ita identifika mákina X-Ray kapta katak iha nia pasta laran ne’e bala. Entaun depois halo verifikasaun, los duni iha bala iha pasta laran. Entaun ita-nian parte servisu alfandega entrega kedan ba polísia hodi prosesa¨, nia afirma.

Nia dehan, Investigasaun Kriminál Nasionál to’o kedan ba fatin hodi asegra kedan suspeitu.

¨Suspeitu ne’e ita lori kedan iha Departamentu Investigasaun Kriminál nia fatin hodi prosesa hafoin halo tiha prosesu ba suspeitu, ita detein kedan suspeitu ne’e iha sela detensaun Departamentu Investigasaun Komandu Jerál PNTL durante oras 72 molok submete ba primeiru interogatáriu¨, nia afirma.

Komandante Jerál PNTL ne’e hateten, iha prosesu investigasaun suspeita katak iha timoroan ne’ebé lori bala musan hanesan oan husi polísia.

¨Los, nia elementu polísia ida nia oan, maibé ida-ne’e observasaun inisiál nia aman polísia maibé agora daudaun ita-nia ekipa iha hela terenu, ita-nia parte justisa, PNTL iha hela terenu hodi identifka ba suspeitu nia aman hodi hateten lolos katak nia ne’e los duni membru polísia nia oan ka lae. Depois mak ita boot sira sei hatene fila fali ninian rezultadu prosesu investigasaun¨, nia konklui.

Rekorda fali katak iha domingu (12/1) horseik tuku 11:15 dadersan, Servisu Nasionál Intelijénsia (SNI) no Alfandega asegura suspeitu nain rua ho inisiál GdSM no OLSG tanba deskonfia lori kilat musan ualu tama mai Fronteira Batugade hafoin fila husi NTT Indonézia.

Suspeitu na’in-rua ne’e, Alfandega no SNI asegura hafoin mákina X-Ray deteta katak sidadaun na’in-rua ne’e lori bala musan ualu, hafoin asegura tiha suspeitu na’in-rua ne’e asegura mós telefone ida.

Jornalista: Natalino Costa

Editór : Zezito Silva

iklan
iklan

Leave a Reply

iklan
error: Content is protected !!