DILI, 14 Janeiru 2025 (TATOLI) – Inspetora-Jerál Autoridade Inspesaun no Fiskalizasaun Atividade Ekonómika, Sanitária no Alimentár, Institutu Públiku (AIFAESA, I.P), Odete Viegas, informa emprezáriu sira ne’ebé komete infrasaun, iha 2024, selu multa $58.280 ba Estadu.
Relatóriu infrasaun ne’e mai husi atividade inspesaun ne’ebé AIFAESA halo ba operadór ekonómiku 5.192 iha territóriu.
“Sasán ne’ebé AIFAESA halo apreensaun hamutuk 12.985, ne’e ba kategória hahán liu prazu, tabaku ilísitu sira no seluk tan”, Odete Viegas adianta iha Matadoru, Dili, ohin.
Tipu infrasaun ne’ebé komersiante sira komete mak atividade lisensa komersiál kaduka, falsifikasaun ba dokumentu no seluk tan.
Nia dehan prosesu inspesaun ne’ebé durante ne’e la’o, AIFAESA kolabora ho entidade sira mak hanesan Alfándega, Ministériu Komérsiu no Insdústria no instituisaun relevante seluk.
Atividade inspesaun ne’e foka liu ba ai-han no materiál importadu sira, produtu rai-laran no seluk tan, ne’ebé realiza iha loja fa’an materiál konstrusaun, kioske, supermerkadu, armazein no seluk tan. Aleinde ne’e, observa mós atividade ekonómika sira ne’e tuir duni regulamentu ne’ebé estabelese ona.
Notísia relevante: AIFAESA sei estabelese laboratóriu ho valór rihun $250 iha tinan ne’e
Jornalista: Arminda Fonseca
Editora: Maria Auxiliadora