DILI, 15 janeiru 2025 (TATOLI)—Tribunál Judisiál Primeira Instánsia Dili (TJPID), kuarta ne’e, halo julgamentu ba aguidu na’in hitu ba kazu akizisaun ró rua ba Ministériu Edukasaun iha tinan 2015.
Arguidu na’in hitu mak ho inisiál hanesan DdC, MCA, MM, AdC, PAdRM, AFXR no CL.
Kazu ne’e akontese iha 2015 bainhira Ministériu Edukasaun anúnsia konkursu públiku ba akizisaun ró speedboat rua ho valór $142.400,00 atu fasilita serbisu Ministériu Edukasaun ba eskola Sekundária Ataúro no Eskola Téknika Volasionál ida iha Akar-Laran, Suai, Munisípiu Covalima. Nune’e, liuhusi konkursu ne’ebé Ministériu Edukasaun halo, empreza Chipys Unipessoal Lda, mak manán no hahú halo akizisaun iha momentu ne’ebá.
Maibé, depoizde prosesu sira-ne’e la’o to’o ohin loron, ró speedboat rua la mai tanba empreza la konsege halo akizisaun tuir kontratu ne’ebé mak molok ne’e selebra ona ho Ministériu Edukasaun.
Haree ba hahalok sira-ne’e, Ministériu Públiku akuza arguidu na’in hitu ba krime partisipasaun ekonomia iha negósiu ne’ebé punidu iha artigu 299 no krime abuzu podér ne’ebé previstu iha artigu 297 tanba arguidu sira konxiente katak hahalok sira-ne’e kontra lei maibé arguidu sira kontinua halo no hamosu prejuizu ba Estadu ho valór $142.400,00.
Iha sala julgamentu Ministériu Públiku ne’ebé reprezenta husi Prokuradór Domingos Goveia Leite, rekere ba Tribunál koletivu ne’ebé prezide prosesu ne’e atu Tribunál koletivu hadi’a julgamentu ne’e tanba arguidu balun Tribunál seidauk notifika. Tuir átu prosesuál atu halo julgamentu ba prosesu ida tenke hetan partisipasaun husi arguidu sira.
Domingos dehan iha kazu ida-ne’e arguidu balun la mai tuir julgamentu tanba seidauk hetan notifikasaun husi arguidu sira.
Iha biban ne’e, defeza husi arguidu DdC husu ba Tribunál atu marka fali julgamentu ne’e ba loron seluk tanba arguidu balun la partisipa julgmentu no arguidu balun nia defeza la marka prezensa.
Hafoin rona tiha parte hotu, Juiza Francisca Cabral pronúnsia katak iha duni arguidu ida mak hato’o nia rekerimentu justifikasaun mai Tribunál tanba kestaun moras. Tanba ne’e mak durante julgmentu ne’ebé realiza ohin nia labele partisipa.
Enkuantu, iha arguidu na’in rua mak Tribunál notifika atu partisipa jugamentu ohin maibé la marka prezensa no laiha pedidu justifikasaun. Kuandu sira na’in rua la marka prezensa bebeik mak Tribunál sei hasai mandadu detensaun hodi detein arguidu na’in rua.
Kazu ne’e Tribunál marka filafali ba loron 22 fulan-janeiru 2025, tuku 09:00 Otl, hodi rona arguidu sira-nia depoimentu.
Audiénsia julgamentu prezide husi juíz koletivu hanesan Juiza Francisca Cabral, José Escurião, Afonso Carmona, enkuantu Ministériu Públiku reprezenta husi Prokuradór Domingos Goveia Leite no Osório Marques. Arguidu sira hetan asisténsia husi Defensór Públiku, Sérgio Quintas, Manuel Exposto no Advogadu Privadu Pedro Camões.
Jornalista: Natalino Costa
Editór: Xisto Freitas da Piedade