BAUCAU, 17 janeiru 2025 (TATOLI)—Konsellu Munisipál Kombatente Libertasaun Nasionál (CMCLN, sigla portugés) Baucau, simu lista reklamasaun kandidatu kombatente libertasaun hamutuk 9.900 resin.
Sekretáriu Jerál CMCLN Baucau, Manuel “Alari” da Costa Soares, esplika hafoin lista veteranu anunsia iha kuadru avizu, mosu reklamasaun barak nune’e CMCLN Baucau forma ona komisaun reklamasaun para bele rona no buka solusaun.
“Ami fahe ona formuláriu no fó orientasaun ba sira atu prenxe hodi kontesta sira-nia direitu ne’ebé mak sente la satisfás,” Sekretáriu Jerál CMCLN Baucau informa ba TATOLI iha Vila Antiga, Baucau, sesta ne’e.
Reklamante sira hosi Baucau instala ona komisaun no prepara karta petisaun no tuir planu sei envia ba Ministériu Asuntu Kombatente Libertasaun Nasionál (MAKLN) ho Prezidente CCLN hodi buka solusaun dentru loron 90.
Hosi totál númeru reklamasaun ne’ebé rejistadu maioria kestiona kona-ba durasaun tinan partisipasaun ba luta libertasaun pártria ne’ebé menus hosi 0-3.
Aleinde ne’e, hosi rihun 9 resin reklamante balun kestiona naran la sai hanesan hosi inan-aman sira ne’ebé lakon vida inklui formuláriu reklamasaun ba ema ne’ebé naran anunsia maibé la konsidera partisipa ba luta libertasaun pártria.
Notísia relevante: PPN husu MAKLN hadi’a lista kombatente bainhira iha reklamasaun
“Durasaun mak barak menus hosi 3. Sees hosi espetativa tanba bainhira anunsia sai la tuir tinan partisipasaun,” Alari haktuir.
Nia informa katak CMCLN Baucau sei halo funsaun hanesan rona no fasilita formuláriu ba reklamante sira nune’e kanaliza kontestasaun ba MAKLN hodi buka solusaun.
Nune’e, CMCLN Baucau distribui ona formuláriu reklamasaun ba kada postu hodi hein iha fulan-abríl tinan ne’e rekolla direta hosi ekipa Ministériu Kombatente Libertasaun Nasionál atu re-verifika ba reklamante sira.
“Ema ne’ebé kontribui la simu maibé ema ne’ebé la kontribui naran sai simu fali. Ida-ne’e halo ita-nia fuan moras,” Alari lamenta.
Alari iha esperansa ba Ministériu Asuntu Kombatente Libertasaun Nasionál atu forma ekipa verifikadór hodi rezolve polémika ne’ebé akontese nune’e kombatente sira bele sastifás ho partisipasaun luta.
Lista Kombatente Libertasaun hosi Munisípiu Baucau hamutuk rihun 12 resin, kompostu kombatente 9.900 resin mak kontesta reklamasaun, mártir 200 resin, inkapasitadu hamutuk 145 no 1.500 resin mak konfirmadu sai benefisiáriu kompostu kategória 8-14, 15-19 no 24.
Jornalista: Natalino Belo
Editór: Xisto Freitas da Piedade