BAUCAU, 17 janeiru 2025 (TATOLI)—Autoridade Administrasaun Munisipál Baucau husu governu sentrál fó atensaun ba kondisaun estrada sira iha área rurál munisípiu Baucau.
Prezidente Autoridade Munisipál (PAM) Baucau, Veneranda Lemos, esplika IX Governu hatudu kompromisu atu hadi’a infraestrutura bázika sira nune’e presiza iha kontinuasaun ba obra sira ne’ebé governu anteriór sira husik hela, liuliu fó prioridade ba estrada rurál sira iha munisípiu.
“Estrada rurál sira tenke kontinua atubele fó benefísiu ba povu sira ne’ebé agrikultór,” Veneranda ba TATOLI iha suku Loilubo, Postu Administrativu Vemasse, sesta ne’e.
Lemos husu autoridade lokál liuhosi xefi suku sira atu hahú identifika estrada sira ne’ebé kondisaun estragu submete bá Administrasaun Munisipál atu diskute antes envia bá nasionál.
Notísia relevante: Governu lansa projetu reabilitasaun estrada dirasaun Loilubo-Fatumaca
Eis deputada ne’e mós rekomenda ba Ministru Planeamentu Investimentu Estratéjiku, Gastão de Sousa atu fó atensaun ba estrada rurál iha munisípiu Baucau hanesan iha suku Ossoala no Uaigae, postu administrativu Vemasse tanba iha tempu udan prejudika komunidade agrikultór sira transporta produtu bá merkadu no, aleinde ne’e, bainhira estrada rezolve sei redús númeru populasaun atu bá buka moris iha sidade tanba liuhosi estrada sei enkoraja ema hotu kontribui dezenvolve idak-dak nia rai.
“Komunidade tenke kontribui ba programa sira ne’ebé nasionál lori mai munisípiu Baucau,” Veneranda Lemos akresenta.
Autóridade Baucau agradese ba governu sentrál tanba tinan ne’e deside kontinua reabilita estrada dirasaun Loilubo ba Fatumaca inklui Caravela no Caisido bá Lanud.
Jornalista: Natalino Belo
Editór: Xisto Freitas da Piedade