BAUCAU, 20 janeiru 2025 (TATOLI)—Autoridade Administrasaun Munisipál (AAM) Baucau liuhosi ekipa konjunta, segunda ne’e, halo inspesaun ba loja xineza sira ne’ebé lokaliza iha Vila Nova, Baucau.
Xefe ekipa atúal Sekretáriu Munisipál Asuntu Planeamentu Investimentu no Dezenvolvimentu, Eduardo Filipe Ximenes, esplika AAM iha kompeténsia atu kontrola atividade negósiu no liuhosi ekipa konjunta halo identifikasaun ba xineza kona-ba lisensa hosi SERVE, I.P.
“Autoridade sei la permite sidadaun ne’ebé de’it tama Baucau la tuir regra. Kuandu la prenxe regra sei deporta,” Eduado realsa.
Realidade iha terrenu, nia haktuir, xineza fa’an hakna’ok (retallu) ne’ebé viola lisensa atividade negósiu tanba tuir lisensiamentu katak xineza ne’ebé halo atividade ekonomia tenke fa’an grosu, no ida-ne’e konsideradu hamate oportunidade negosiante lokál iha Baucau.
“Sira fa’an hakna’ok fali ne’e labele,” nia hateten.
Notísia relevante: Membru PN husu Governu kontrola xineza halo atividade negosiu to’o munisipiu
Ba kazu ne’e, Eduardo informa, AAM deside hapara ona atividade loja xineza no haruka fila bá Dili.
Totál loja xineza ne’ebé hala’o atividade negósiu iha Baucau Vila hamutuk hitu no ekipa konjunta liuhosi inspesaun deside hapara loja xineza rua lokalizadu iha área Planalto tanba konsidera viola regra negósiu.

Entretantu, ekipa konjunta referida kompostu husi Diresaun Komérsiu Indústria, SERVE, I.P, Jestaun Merkadu, Autoridade Postu Administrativu no hetan seguransa husi Komandu Polísia Baucau.
Tuir Lei Investimentu, ema estranjeiru ne’ebé halo investimentu iha Timor tenke ho kapitál finanseiru boot ka maizumenus kapitál millaun ida ba leten, hodi halo investimentu liuhusi loke kampu serbisu ba timoroan sira, la’ós mai hadau malu halo negósiu ho timoroan sira.
Jornalista: Natalino Belo
Editór: Xisto Freitas da Piedade