DILI, 20 janeiru 2025 (TATOLI)—Autoridade Inspesaun no Fiskalizasaun Atividade Ekonómika no Sanitária (AIFAESA) disemina kódigu konduta ba funsionáriu sira atu servisu ho responsabilidade.
“Papél AIFAESA hanesan fiskalizadór ida-ne’ebé atu halo monitorizasaun ba servisu sira ne’ebé mak liga ho ema barak nia papél, liuliu protesaun ba konsumidór sira. Entaun, ami hadi’a uluk ami-nia an iha instituisaun ida-ne’e, atubele servisu ho responsabilidade,” Inspetora AIFAESA, Odete Viegas da Silva informa ba jornalista sira, iha salaun CNE, Dili, segunda ne’e.
Nia afirma, hanesan inspetora mandatu ne’e hahú iha outubru tinan kotuk ne’ebé tuir observasaun katak iha buat balun ne’ebé mak presiza hadi’a, entaun ho ida-ne’e mak daudaun ne’e halo ona kódigu konduta.
Notísia relevante: AIFAESA sei estabelese laboratóriu ho kustu rihun $250 iha tinan ne’e
“Ha’u simu mandatu hahú iha outubru, tinan kotuk. Entaun, husi ne’ebá tuir ha’u-nia observasaun katak iha buat balun ne’ebé presiza hadi’a, entaun ida-ne’e mak daudaun ne’e ita halo kódigu konduta, nune’e ita labele repete erru ida-ne’ebé mak hanesan. Ami eduka ami-nia funsionáriu sira katak ita-nia papél no responsabilidade boot tebes ne’ebé liga ho ema-nia vida, entaun ida-ne’e mak ita tenke halo,” nia relata.
Iha fatin hanesan, Koordenadór Gabinete Vise Primeiru-Ministru no Ministru Koordenadór Asuntu Ekonómiku no Ministru Turizmu no Ambiente, Jorge Rui Martins, haklaken AIFAESA nu’udár instituisaun públiku tenke iha padraun ida-ne’ebé mak klaru hanesan disiplina iha servisu no fiskalizasaun ba ofisiál sira iha kampu nune’e ema labele iha entendimentu sala iha AIFAESA nia kna’ar no responsabilidade.
“AIFAESA tenke prepara nia ema, signifika katak prepara nia rekursu umanu hodi obedese estruturál, tanba iha instituisaun ida tenke iha regulamentu ida hodi komunika ho konsumidór sira ho di’ak,” nia subliña.
AIFAESA hanesan autoridade inspesaun ida-ne’ebé kontrola atividade ekonómika iha territóriu laran tomak atu garante kumprimentu ba lei no dekretu-lei sira ne’ebé regula atividade komersiál sira.
Durante ne’e, AIFAESA, I.P hala’o inspesaun ba atividade operadór ekonómiku sira tuir dekretu-lei númeru: 26/2016, 29 juñu, ba atividade rejime infrasaun administrativa kontra ekonomia no seguransa alimentár, dekretu-lei númeru: 23/2009, 5 agostu, regulamentu indústria no komersializasaun jéneru alimentísiu no dekretu-lei númeru: 28/2011 no lei númeru: 8/2016, 8 jullu, ba protesaun konsumidór.
Jornalista: Felicidade Ximenes
Editór: Xisto Freitas da Piedade