iklan

HEADLINE, OEKUSI

Autoridade RAEOA planu renova kontratu ho INFPM hodi kontinua fornese ai-moruk

Autoridade RAEOA planu renova kontratu ho INFPM hodi kontinua fornese ai-moruk

Sekretàriu Rejionàl ba Asuntu Saúde, Luís de Jesus Neno. Foto Tatoli/Abílio Elo Nini

OÉ-CUSSE, 20 Janeiru 2025 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), lideradu Rogério Tiago Lobato, sei kontinua renova kontratu ho Institutu Nasionál Farmasia Produtu Médiku (INFPM), hodi kontinua fornese ai-moruk ba fasilidade saúde sira iha Oé-Cusse.

Sekretáriu Rejionál ba Asuntu Saúde, Luís de Jesus Neno, hateten, tuir loloos akordu termina ona iha loron 31 dezembru 2024, maibé tanba ekipa jurídiku mak atraza hodi prepara dokumentu ba renovasaun kontratu.

“Agora, parte juridiku sira prepara hela dokumentu, atubele extende-tán akordu, tanba akordu uluk termina ona iha loron 31 Dezembru 2024, entaun agora prepara atu renova fali, nune’e INFPM bele fornese ai-moruk mai Oé-Cusse. akordu ne’e sei selebra iha Janeiru nia rohan,” Luís Neno ba Ajénsia Tatoli iha Oé-Cusse, ohin.

Nia informa, maske akordu ne’e termina ona maibé INFPM kontinua fornese ai-moruk inklui medikamentu ba fasilidade saúde Oé-Cusse hodi garante estoke labele mamuk.

“Iha Janeiru 2025 ne’e, ita-nia estoke ai-moruk sei barak, mezmu kontratu ne’e remata ona, maibé suporta ai-moruk la’o nafatin depois mak ita selu ho invoice ka resibu,” nia dehan.

Rekorde katak, iha Fevereiru 2024, Prezidente Autoridade RAEOA Rogério Tiago Lobato, selebra kontratu ho Institutu Nasionál Farmasia Produtu Médiku (INFPM), ho kustu rihun $511,000.00 hodi fornese ai-moruk ba Hospitál Referénsia Oé-Cusse (HRO) durante tinan ida.

Notísia relevante:Autoridade RAEOA kontrata INFPM ho kustu rihun $511 atu fornese ai-moruk

Entretantu, totál pesoál saúde iha Oé-Cusse hamutuk 427  destaka ba servisu saúde rejionál, Hospitál Referál Oé-Cusse, sentru saúde lima no postu saúde 20 iha territóriu Oé-Cusse no fatin tratamentu suku iha fatin izoladu 11, inklui pontu entrada fronteira Sakato no aeroportu internasionál Rota do Sândallo.

Jornalista: Abílio Elo Nini

Editor: Florencio Miranda Ximenes

iklan
iklan

Leave a Reply

iklan
error: Content is protected !!