DILI, 20 janeiru 2025 (TATOLI)—Tribunál Judisiál Primeira Instánsia Dili (TJPID), segunda ne’e, halo prosesu sumáriu ba krime ofensa simples. Liuhusi julgamentu ne’ebé prezide husi Juíz Prosesu José Maria ne’e, deside arguidu RSN no lezadu ZS hadame malu.
Juíz José Maria omóloga hodi deside halo konsiliasaun ba arguidu no lezadu tuir artigu 272 hosi Kódigu Penál Timor-Leste, ho razaun tanba haree ba krime ofensa simples ne’ebé Ministériu Públiku imputa ba arguidu ne’e nu’udár krime ne’ebé mak ho karaterístika semi públiku. Kuandu krime semi públiku lei fó dalan atu taka nia prosesu.
Iha prosesu konsiliasaun ne’e, lezadu ZS aseita hodi fó perdua ba aguidu RSN ba sala ne’ebé nia komete. Arguidu nia família mós aseita ho prosesu konsiliasaun ne’e no família sira lori osan $1.500 entrega ba Tribunál nune’e Tribunál entrega ba lezada hodi kura nia kanek.
“Ohin ita haree Tribunál halo tentativa konsiliasaun ba kazu ida-ne’e no kazu ida-ne’e to’o ona nia rohan, tanba lezadu hakarak hadame malu ho arguidu. Família arguidu mós entrega osan ba lezadu uza hodi halo kurativu ba nia moras. Prosesu ne’e taka ona no sei laiha tan problema,” Juíz José Maria deklara iha sala audiénsia julgamentu TJPID, Caicoli.
Juíz José mós liuhosi nia despaxu hodi devolve filafali arguidu RSN nia motór ne’ebé momentu ne’ebá arguidu uza tenta sona lezadu ZS iha área Becora.
Entretantu, tuir akuzasaun Ministériu Públiku katak arguidu RSN iha loron 31 dezembru 2024 bainhira komunidade selebra tinan tuan troka tinan foun, arguidu ho motór kondús ho velosidade maka’as iha área terminál Becora, Postu Administrativu Cristo Rei, mai para tiha iha lezadu ZS nia oin nune’e arguidu tenta atu sona dala ida ba lezadu nia kabun maibé la konsege tanba lezadu halo auto defeza ba nia an. Maibé tanba hakfodak ho tenttivu ne’e, lezadu monu ba rai rezulta ninia kotuk laran kanek.
Lezadu koñese ema ne’ebé tenta atu sona nia ne’e. Tan ne’e, nia telefone kedan ba polísia no momentu ne’ebá autoridade seguransa kaptura arguidu. Haree ba arguidu nia hahalok ne’e, Ministériu Públiku imputa krime arma branka ne’ebé previstu iha lei númeru: 5/2017. Maibé, iha prosesu sumáriu iha Tribunál, Tribunál singulár halo tiha kualifikasaun alterasaun jurídika husi krime arma branka ba krime ofensa simples ne’ebé previstu no punidu iha artigu 145º.
Jornalista: Natalino Costa
Editór: Xisto Freitas da Piedade