iklan

HEADLINE, POLÍTIKA

Bankada KHUNTO apoiu alterasaun lei Pensaun Vitalísia

Bankada KHUNTO apoiu alterasaun lei Pensaun Vitalísia

Deputadu Bankada KHUNTO, Luís Roberto. Imajen/Doc. Tatoli

DILI, 21 janeiru 2025 (TATOLI)–Bankada opozisaun husi Kmanek Haburas Unidade Nasionál Timoroan (KHUNTO) iha Parlamentu Nasionál (PN) prontu fó apoiu alterasaun lei Pensaun Vitalísia.

“Ba ami Bankada KHUNTO nu’udar opozisaun no inísiu kedas hetan asentu iha Parlamentu ida-ne’e, sempre ko’alia prontu submete bainhira atu halo alterasaun ba lei Pensaun Vitalísia,” Vise Bankada KHUNTO, Luís Roberto, deklara iha resintu PN, tersa ne’e.

Nune’e, Bankada prontu fó apoiu bainhira iha inisiativa ruma husi Governu atu halo alterasaun ba Pensaun Vitalísia.

Tuir KHUNTO atu halakon presiza iha konsensu entre Bankada Parlamentár hotu.

“Atu halakon lei Pensaun Vitalísia mós presiza konsensu ne’ebé di’ak, komesa husi lei inan ba to’o lei oan sira, ita tenke normaliza ho didi’ak molok atu halakon,’’ nia akresenta.

Notísia relevante : PN fó prioridade ba lei lima no altera pensaun vitalísia iha tinan 2025

Bainhira halo alterasaun, Bankada fó apoiu tomak atu altera hodi hamenus pensaun ninia persentajen ba direitu nu’udar antigu membru Governu ka antigu Deputadu.

Bankada mós sujere atu halakon Pensaun Vitalísia ho hanoin tenke halo uluk revizaun husi Konstituisaun, nune’e tuir mak haree lei oan sira ka halakon Pensaun Vitalísia tanba direitu adkiridu ne’e hatur iha lei inan.

“Ba ami importante mak konsensu polítika iha Parlamentu, hotu-hotu konkorda halo revizaun boot ba Konstituisaun, depois ita hadi’a lei oan sira hodi nune’e Timor-Leste ne’e se de’it serbisu mak han, labele toba iha uma mai fulan-fulan simu osan,” nia tenik.

Tuir KHUNTO tempu ona atu altera Pensaun Vitalísia, tanba haree ba problema nasaun nian la kleur tan sei hasoru presipísiu fiskál fundu petrolíferu besik hotu.

“Tinan 20-resin ita restaura indepedénsia povu barak kontinua halerik ba infraestrutura bázika hanesan estrada, bee-moos, eletrisidade no seluk tan. Loloos orsamentu ne’e tau ba setór hirak ne’e hodi rezolve preokupasaun povu nian,” Deputadu Bankada opozisaun hato’o.

Antes ne’e, Prezidente Parlamentu Nasionál, Maria Fernanda Lay, fó sai iha tinan ne’e sei fó prioridade ba diskusaun lei lima inklui alterasaun Pensaun Vitalísia.

Jornalista     : Nelson de Sousa

Editora          : Julia Chatarina

iklan
iklan

Leave a Reply

iklan
error: Content is protected !!