BAUCAU, 21 janeiru 2025 (TATOLI)—Ministériu Edukasaun sei fó sansaun ba profesór sira ne’ebé deskonfiadu envolve ka treinu arte marsiál.
Ministra Edukasaun, Dulce de Jesus Soares, hateten nia parte rona informasaun kona-ba pesoál mestre balun pratika arte marsiál, tan ne’e orienta inspetór eskola atu identifika manorin-na’in ne’ebé envolve atividade referida.
“Inspesaun mak sei halo atuasaun, kuandu iha evidénsia profesór sira pratika duni arte marsiál,” Ministra Edukasaun hateten iha salaun Jináziu, Vila Nova, Baucau, tersa ne’e.
Governante ne’e rona informasaun katak profesór balun treinu subar hosi estudante sira iha tempu kalan ne’ebé bele afeta ba prosesu aprendizajen tanba sei kria relasaun komunikasaun entre estudante ho profesór bele ladi’ak iha prosesu aprendizajen.
Alende ne’e, nia hatutan, bainhira situasaun ne’e akontese sei implika manorin-na’in sira tanba laiha vontade hanorin estudante ne’ebé sai mestre iha organizasaun arte marsiál.
Notísia relevante: Fanatizmu ba grupu arte marsiál: bele halakon sentidu “maun-alin” nu’udar maubere ou timoroan
Ministra solisita inspetór eskola sira tenke kontinua halo inspesaun bá eskola sira ne’ebé deskonfiada iha pesoál profesór balun envolve atividade Organizasaun Arte Marsiál (OAM) nune’e bainhira identifika fó sansaun kedas bazeia ba Lei Komisaun Funsaun Públika (KFP).
Iha fatin hanesan, Diretora Eskola Ensinu Báziku Katólika São José Baguia, Leopoldina Joana Gutteres, rekoñese iha postu Baguia pesoál profesór balun envolve an nu’udár alunu ba estudante sira iha pratika atividade arte marsiál, nune’e nia prontu apoia inisiativa Ministériu Edukasaun atu halo inspesaun ba kada eskola sira iha munisípiu Baucau.
“Ne’e fó impaktu ba prosesu aprendizajen tanba mestre atu hanorin, maibé nia haree treinadór iha, entaun afeta ba kualidade ensinu,” Leopoldina haktuir.
Entretantu, Governu liuhosi reuniaun Konsellu Ministru (KM) aprova rezolusaun Governu númeru 17/2024, loron 24 abríl, hodi suspende atividade arte marsiál ka taka temporária ba fatin instalasaun hotu-hotu ne’ebé destinadu ba ensaiu, aprendizajen no pratika arte marsiál.
Jornalista: Natalino Belo
Editór: Xisto Freitas da Piedade
