BAUCAU, 21 janeiru 2025 (TATOLI)—Sekretariadu Tékniku Administrasaun Eleitorál (STAE), tersa ne’e, distribui ona materiál eleisaun suku foun kompostu husi materiál sensitivu no la’ós sensitivu bá munisípiu Baucau atu realiza eleisaun iha 25 janeiru.
Diretór STAE Baucau, Natividade Freitas Guterres, esplika materiál hirak-ne’e ohin transporta hosi Dili no hetan akompañamentu hosi Komisaun Nasionál Eleitorál (CNE, sigla portugés) Baucau inklui hetan seguransa hosi Komandu Polísia Nasionál Timor-Leste (PNTL) Baucau.
“Ami sei verifika fali materiál sira-ne’e bainhira la to’o sei informa ba nasionál atu kompleta no tuir planu sei halo pakotementu iha kinta (23/01/2025),” Diretór STAE Baucau informa ba TATOLI iha nia eskritóriu, Vila Nova, Baucau.
Materiál sensitivu kompostu hosi livru buletin votu hamutuk 83 ne’ebé bazeia ba totál votante. Ezemplu, buletin votu, akta meza asembleia aldeia, deklarasaun kandidatura, lista apoiante proponente, lista eleitór, akta kontajen inisiál eleisaun suku, akta apoiante suku, envelope votu, banner, lista observasaun no karimbu órgaun suku.
Notísia relevante: STAE Baucau preparadu realiza eleisaun suku foun iha 25 janeiru
Enkuantu, materiál la’ós sensitivu kompostu husi livru ajenda, lapizeira, clip card, kabas, pregu, espidól, kalkulatór, tisu, agrafadór, surat-tahan (HVS), uniforme ba Pesoál STAE Apoia Aldeia (PSAA) no Pesoál STAE Apoia Suku (PSAS) no seluk tan.
“Agora ladún preukupadu hanesan uluk tanba xefe aldeia sira eziste ona no agora halo eleisaun ba de’it xefe suku sira entaun prosesu sei lalais,” Natividade akresenta.
STAE sei prepara tan membru Apoia Asembleia Meza hanesan verifikasaun no hakerek bainhira eleitór liu na’in 300 iha sentru votasaun tanba hakarak fasilita hodi aselera prosesu votasaun.
Suku foun ne’ebé sei realiza eleisaun iha 25 janeiru hodi hili líder suku kompostu husi suku Builai no Caibada Makasa’e lokalizadu iha postu administrativu Baucau Vila, enkuantu suku Ueru-Mata pertense ba postu administrativu Laga.
Suku Builai iha aldeia haat mak hanesan Builai, Alala, Manulao no Samalaculiba. Caibada Makasa’e iha aldeia haat kompostu hosi Boru-baha, Caiobilale, Data-ua no Maulame no suku Ueru-Mata aldeia iha ida mak aldeia Ueru-Mata.
Eleisaun suku foun iha Baucau ne’e sei envolve eleitór hamutuk 3.500 resin kompostu husi suku Builai eleitór 1.600 resin, Caibada Makasa’e 1.600 resin no Ueru-Mata hamutuk eleitór na’in 300 resin.
Kandidatura xefe suku hosi suku tolu ne’ebé mensionadu hamutuk na’in sia kompostu mane na’in ualu, feto ida. Suku Builai kandidatu na’in tolu, Caibada Makasa’e na’in tolu (mane rua no feto ida), enkuantu suku Ueru-Mata iha kandidatu na’in ida.
Suku foun tolu ne’e estabelese hosi VIII Governu Konstitusionál ne’ebé lidera hosi Jenerál Taur Matan Ruak no nia estabelesementu bazeia ba Lei Suku númeru: 19/2023 ne’ebé previstu iha artigu 91, iha-ne’ebé fó kompeténsia ba Ministériu Administrasaun Estatál (MAE) deside kriasaun suku foun referidu. Nune’e, iha munisípiu Baucau totál suku akrese ona ba 62 hosi postu administrativu ualu mak hanesan postu administrativu Baucau Vila, Vemasse, Venilale, Laga, Baguia, Quelicai, Matebian no Quelicai Antiga.
Jornalista: Natalino Belo
Editór: Xisto Freitas da Piedade