Autoridade RAEOA divulga Dekretu-Lei ezekusaun OJE no PAA 2025
OÉ-CUSSE, 24 Janeiru 2025 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), Rogério Tiago Lobato, sesta ne’e, hala’o divulgasaun ba Dekretu-Lei númeru 43/2024, loron 20 Dezembru, kona-ba ezekusaun Orsamentu Jerál Estadu (OJE) 2025 no Planu Asaun Anuál (PAA) 2025 ba funsionáriu no kargu xefia sira.
Objetivu husi dizeminasaun ne’e atu mellora jestaun kontrolu ba jestór sira no kresimentu prestasaun servisu mak hanesan, akompaña prosesu ba intervensaun identifika kestaun ruma ne’ebé mosu, rekolla dadús kona-ba ezekusaun orsamentu bazea ba programa no atividade sira.
Hadi’a efisiénsia ka poupansa utilizasaun rekursu ho tempu di’ak, hasa’e kualidade dezempeñu, ajuda jestór sira foti desizaun ho di’ak, mellora kualidade intervensaun progresu no rezultadu sira, fornese dadus no prepara planu tuir mai.
Biban ne’e, Prezidente Autoridade RAEOA, Rogério Tiago Lobato, konsidera dizeminasaun ne’e importante ba dirijente no funsionáriu tanba RAEOA tutela direta ba Primeiru-Ministru.
“Dizeminasaun orsamentu ne’e la’ós lori de’it ha’u-nia naran. Hanesan ita hotu hatene iha estrutura iha RAEOA ita tutela direta ba Primeiru-Ministru, tuun mai Prezidente Autoridade ho Sekretáriu Rejionál sira, iha okos liu mak Komisaun Ezekutivu ZEEDOA. Agora 2025, tenke oin seluk. Iha 2024 ha’u labele dehan ita susesu bo’ot, maibé ita halo buat ruma, ho osan oituan ita halo buat barak,” dehan Prezidente Autoridade RAEOA ne’e iha otél Ambeno, ohin.
Tanba ne’e, nia enkoraja funsionáriu sira atu kontinua presta servisu di’ak, no presiza halo diskusaun karik iha duvida ba asuntu ezekusaun orsamentu.
“Tinan ne’e, tenke servisu di’ak liután husi 2024, tanba ita-nia ezekusaun iha 2024 atinje de’it 68%, maibé pursentu ne’e ita selu de’it tusan sira husi 2017 to’o agora, projetu 100-resin ita seidauk selu hotu, tan ne’e iha 2025 ita halo esforsa atu selu hotu tusan sira-ne’e hotu. Ha’u espera bainhira ita servisu hamutuk ita rona malu, ita-nia ezekusaun tinan ne’e bele sa’e to’o 90%, ha’u husu ita hotu, tenke halo esforsa,” nia apela.
Iha fatin hanesan, Diretór Rejionál Planeamentu no Administrasaun Finansa RAEOA, Domingos Maniquin, afirma dizeminasaun ne’e iha parte tolu, dahuluk ezekusaun OJE 2024 nian, atu bele sai fundasaun hakat ba 2025, no dizeminasaun Dekretu-Lei ba OJE 2025 nian.
“OJE 2025 ita propoin ba millaun $128, maibé ikus mai fó ita iha tetu millaun $42. Maibé ho esforsa husi Prezidente Autoridade ho tékniku sira konsege hetan taan millaun $20 ne’ebé daudaun iha aprovasaun orsamentu RAEOA hetan millaun $62, tan ne’e iha tempu presiza informa ba malu iha dizeminasaun ne’e,atu ita hatene loloos ezekusaun orsamentu hira iha Oé-Cusse,” nia afirma.
Alokasaun OJE 2025 ba RAEOA iha millaun $62, neʼebé millaun $36,001,473.00 ba autoridade RAEOA no $26,179,527 ba Fundu Espesiál Dezenvolvimentu (FED).
Alokasaun proposta OJE 2025 ba autoridade $36,001,473 ne’e, hodi aloka ba saláriu vensimentu $14,662,131.00, bens no serbisu $10,125,289.00, públika $4,214,053.00 no dezenvolvimentu $7,000,000.00. transferénsia kapitál..
Notísia relevante:Rogério Lobato hein despaisu ofisiál hosi PM estende kontratu ba funsionáriu ZEEDOA
Jornalista: Abílio Elo Nini
Editór: Florencio Miranda Ximenes
