iklan

HEADLINE, OEKUSI

Rogério Lobato hein despaisu ofisiál hosi PM estende kontratu ba funsionáriu ZEEDOA

Rogério Lobato hein despaisu ofisiál hosi PM estende kontratu ba funsionáriu ZEEDOA

Prezidente Autoridade (RAEOA), Rogério Tiago Lobato, kuarta neʼe, hala’o vizita ba komunidade sira iha suku Bene-Ufe sub-rejiaun Nítibe hodi hala'o diálogu aberta atu rona preokupasaun problema inklui fahe mós nesesidade bázika. Imajen TATOLI/Abílio Elo Nini

OÉ-CUSSE, 24 Janeiru 2025 (TATOLI)– Prezidente Autoridade Rejiaun Administrativa espesiál Oé-Cusse Ambeno (RAEOA), Rogério Tiago Lobato, informa haruka ona karta no hein despaisu ofisiál hosi Primeiru-Ministru, Kay Rala Xanana Gusmão, atubele estende kontratu ba Komisaun Ezekutiva Zona Ekonómia Dezenvolvimentu Oé-Cusse Ambeno (ZEEDOA) hamutuk ho funsionáriu sira tanba mandatu sei hotu iha 31 Janeiru 2025.

“Komisaun ZEEDOA sira-nia mandatu tinan ida no daudaun ne’e mandatu hotu ona. Nune’e,  ohin ha’u haruka karta urjente ba Primeiru-Ministru, atu fó instrusaun ka halo despaisu ruma mai ha’u hodi asina renovasaun kontratu,” Rogério Lobato, dehan iha Otél Ambeno Oé-Cusse, ohin.

Prezidente Autoridade ne’e dehan, makse kontratu falta loron hitu atu hotu, maibé husu nafatin ba funsionáriu sira iha ZEEDOA kontinua hala’o servisu ba Estadu.

“Ha’u la haluha imi, maibé ha’u tenke halo buat hotu tuir lei. Tanba kuandu ha’u mak asina sala, sei ba para iha otél Becora, ne’ebé to’o oras ne’e, ha’u labele simu hodi renova sira-nia kontratu maibé kalma, tanba sei hein despaisu ruma hosi Primieru-Ministru,” Lobato promete.

Notísia relevante:ZEEDOA aprezenta relatóriu ba Primeiru-Ministru 

Iha biban hanesan, Vise-Koordenadór ZEEDOA, Regio da Cruz Salu, konsidera, deklarasaun ne’e legál no razaun duni, tanba durante ne’e, ho rezolusaun Governu númeru 07/2014, hateten katak, durante fulan-12, komisaun ZEEDOA nia servisu iha Oé-Cusse administrativamente lojístika RAEOA mak finánsia.

Vise-Koordenadór ZEEDOA, Regio da Cruz Salu.
Foto Tatoli/Abílio Elo Nini

“Regra legál mak ne’e duni, nune’e  kestaun renova ka la renova husi Prezidente Autoridade, ne’e kestaun administrasaun legál, tanba ami-nia mandatu hela loron 7, mandatu komisaun ezekutivu ZEEDOA ba fulan-12 tuir rezolusaun Governu númeru 07/2024 sei remata,”nia afirma.

Mandatu ZEEDOA ba tinan ida iha objetivu tolu mak dahuluk prepara relatóriu Estadu Rejiaun, aprezenta ona iha Konsellu Ministru no públikada, daruak prepara planu estratéjiku dezenvolvimentu fazeadamente ba Zona Ekonómia Dezenvolvimentu no aprezenta ona.

Objetivu datoluk, mak atu elabora no prodús pakote enkuadramentu legál hothotu, ne’ebé define autoridade zona ekonómia espesiál nian no Dekretu-Lei kona-ba oinsa mak implementa modelu Zona Ekonómia Espesiál Timor-Leste nian iha Oé-Cusse.

Entretantu, João Mendes Gonçalves, hetan nomeasaun hosi IX Governu Konstitusionál lideradu Primeiru Ministru, Kay Rala Xanana Gusmão, no simu pose nu’udar koordenadór ZEEDOA iha loron 31 Janeiru 2024, no dezigna Régio da Cruz Salu no Herculano de Sousa hanesan Vise-Koordenador ho  totál funsionáriu hamutuk 44.

Notísia relevante:PM Xanana husu Autoridade RAEOA no ZEEDOA jere osan povu ho didi’ak

ZEEDOA prioriza ba transformasaun Oé-Cusse sai destinu prinsipál ba turizmu

Jornalista: Abílio Elo Nini

Editór: Florencio Miranda Ximenes

iklan
iklan

Leave a Reply

iklan
error: Content is protected !!