iklan

BAUKAU, ELEISAUN, HEADLINE, MUNISÍPIU

STAE finaliza pakotamentu materiál eleisaun suku foun iha Baucau

STAE finaliza pakotamentu materiál eleisaun suku foun iha Baucau

Diretór STAE Baucau, Natividade Freitas Guterres. Imajen Tatoli/Natalino Belo

BAUCAU, 23 janeiru 2025 (TATOLI)—Sekretariadu Tékniku Administrasaun Eleitorál (STAE), kinta ne’e, finaliza ona materiál sensitivu no la’ós sensitivu eleisaun suku foun iha munisípiu Baucau.

Diretór STAE Baucau, Natividade Freitas Guterres, esplika hafoin materiál hirak-ne’e transporta husi Dili iha loron segunda (21/01/2024) no halo verifikasaun la deteta buletin votu hetan estragu nune’e ohin kontinua halo pakotamentu durante oras rua.

“Ohin loron ita halo pakotamentu, maibé oras ida de’it tanba sentru votasaun sia bazeia ba totál aldeia ne’ebé eziste iha suku foun tolu,” Natividade informa ba TATOLI iha nia eskritóriu, Vila Nova, Baucau, tersa ne’e.

Durante pakotamentu referidu, hetan akompañada hosi autoridade munisipál nu’udár na’in ba eleisaun suku, ekipa tékniku STAE, ekipa Pesoál STAE Apoia Aldeia (PSAA), Pesoál STAE Apoia Suku (PSAS) no hetan supervizaun hosi Komisaun Nasionál Eleitorál (CNE, sigla portugés) munisípiu Baucau.

Natividade haktuir katak durante oras ida halo pakotamentu ekipa prepara kaixa 18 kompostu sia utiliza ba materiál sensitivu no sia seluk utiliza ba materiál la’ós sensitivu, nune’e fasilita bainhira halo distribuisaun ba sentru votasaun ne’ebé eziste ona iha suku foun tolu.

“Antes halo pakotamentu, ami halo tan verifikasaun no laiha failansu ruma iha buletin votu,” Natividade Freitas esplika.

Enkuantu, materiál la’ós sensitivu kompostu husi livru ajenda, lapizeira, clip card, kabas, pregu, espidól, kalkulatór, tisu, agrafadór, surat-tahan (HVS), uniforme ba Pesoál STAE Apoia Aldeia (PSAA) no Pesoál STAE Apoia Suku (PSAS) no seluk tan.

STAE sei prepara tan membru Apoia Asembleia Meza hanesan verifikasaun no hakerek bainhira eleitór liu na’in 300 iha sentru votasaun tanba hakarak fasilita hodi aselera prosesu votasaun.

Notísia relevante: STAE Baucau preparadu realiza eleisaun suku foun iha 25 janeiru

Suku foun ne’ebé sei realiza eleisaun iha 25 janeiru hodi hili líder suku kompostu husi suku Builai no Caibada Makasa’e lokalizadu iha postu administrativu Baucau Vila, enkuantu suku Ueru-Mata pertense ba postu administrativu Laga.

Suku Builai iha aldeia haat mak hanesan Builai, Alala, Manulao no Samalaculiba. Caibada Makasa’e iha aldeia haat kompostu hosi Boru-baha, Caiobilale, Data-ua no Maulame no suku Ueru-Mata aldeia iha ida mak aldeia Ueru-Mata.

Eleisaun suku foun iha Baucau ne’e sei envolve eleitór hamutuk 3.500 resin kompostu husi suku Builai eleitór 1.600 resin, Caibada Makasa’e 1.600 resin no Ueru-Mata hamutuk eleitór na’in 300 resin.

Kandidatura xefe suku hosi suku tolu ne’ebé mensionadu hamutuk na’in hitu kompostu mane na’in neen, feto ida. Suku Builai kandidatu na’in tolu, Caibada Makasa’e na’in tolu (mane rua no feto ida), enkuantu suku Ueru-Mata iha kandidatu na’in ida.

Suku foun tolu ne’e estabelese hosi VIII Governu Konstitusionál ne’ebé lidera hosi Jenerál Taur Matan Ruak no nia estabelesementu bazeia ba Lei Suku númeru: 19/2023 ne’ebé previstu iha artigu 91, iha-ne’ebé fó kompeténsia ba Ministériu Administrasaun Estatál (MAE) deside kriasaun suku foun referidu. Nune’e, iha munisípiu Baucau totál suku akrese ona ba 62 hosi postu administrativu ualu mak hanesan postu administrativu Baucau Vila, Vemasse, Venilale, Laga, Baguia, Quelicai, Matebian no Quelicai Antiga.

Jornalista: Natalino Belo

Editór: Xisto Freitas da Piedade 

iklan
iklan

Leave a Reply

iklan
error: Content is protected !!