HNGV rejista inan grávida 6.050, maioria partu normál
DILI, 24 janeiru 2025 (TATOLI)—Diretora Administrasaun Finansa no Lojístika Hospital Nacional Guido Valadares (HNGV), Sara Maria Xavier, afirma durante tinan 2024, HNGV rejista inan isin-rua (grávida) hamutuk 6.050.
“Totál inan ne’ebé mak partu iha tinan 2024 iha HNGV, hamutuk 6.050. Husi númeru ne’e partu normál hamutuk 4.021 no partu sezariana hamutuk 1.378,” Sara informa ba jornalista sira iha nia kna’ar fatin, HNGV, Bidau, Dili, sesta ne’e.
Nia husu inan sira ne’ebé mak partu normál bele bá partu iha sentru saúde sira ne’ebé besik, tanba HNGV simu kazu ne’ebé iha komplikasaun, tan ne’e presiza halo intervensaun husi doutór espesialista sira.
“Ba inan sira ne’ebé mak partu normál, tuir loloos partu sira-ne’e bele akontese iha sentru saúde komunitária sira, tanba HNGV sentru kuidadu ba atendimentu sekundáriu no tersiáriu nian, katak ita simu kazu ne’ebé maka iha komplikasaun no presiza iha intervensaun husi espesialista. Maibé, se inan isin-rua sira ne’ebé mak partu normál mai hotu iha-ne’e entaun impaku ba espasu iha HNGV,” Sara informa.
Notísia relevante: Inan isin-rua la konsumu hahán nutritivu kontribui bebé falta proteína
Nia esklarese, totál bebé sira ne’ebé mak moris iha HNGV durante 2024 hamutuk 5.970 no kompara ho tinan 2023, númeru inan sira partu iha 2024 boot liu.
Nia relata, tuir padraun alta iha HNGV, pasiente baixa tenke oras 24 nia laran, maibé pasiente balun alta sedu, la tuir padraun oras 24 tanba ligadu ho espasu. Entaun, pasiente oras neen de’it médiku sira reviu no check fali sira-nia kondisaun haree ba bebé ho inan di’ak ona, sira bele alta.
“Maski médiku haruka sira alta, maibé nafatin hameno katak bainhira to’o iha dalan ka uma mak akontese hanesan isin-manas, ran fakar bele bá filafali fasilidade saúde sira ne’ebé mak besik,” nia subliña.
Nia dehan, Hospital Nacional Guido Valadares iha esperansa katak iha tinan ne’e bainhira hahú konstrusaun ba edifísiu pediatria bele aumenta ona espasu iha maternidade.
Jornalista: Felicidade Ximenes
Editór: Xisto Freitas da Piedade
