BAUCAU, 24 janeiru 2025 (TATOLI)—Governu liuhosi Ministériu Justisa (MJ) sei halo mapeamentu ba instituisaun tutelada sira relasiona ho programa implementasaun Balkaun Únika.
Ministru Justisa, Sergio Hornai, esplika planu mapeamentu referidu nu’udár parte husi polítika Ministériu Justisa nian tanba liuhosi sistema balkaun únika diresaun hotu tutelada bele halo atendimentu lalais ba komunidade.
“Ministériu Justisa konxiente ho programa ida-ne’e, sei tenta atu buka halo mapeamentu alargamentu serbisu diresaun notariadu nian hodi hakbesik liubá komunidade,” Ministru Justisa hateten bainhira partisipa iha seremónia lansamentu Balkaun Únika iha Vila Nova, Baucau, sesta ne’e.
Nia hatutan MJ buka komprende polítika Governu nian hodi ajusta tuir sistema dijitalizasaun hamutuk ho Autoridade Administrasaun Munisipál nune’e bele estabelese di’ak liután sistema balkaun únika hanesan atendimentu pasaporte, Billete Identidade (BI) no sertidaun nasimentu (moris).
Notísia relevante: Governu lansa Balkaun Únika iha Baucau
Sergio Hornai haktuir katak akordu entre Ministériu Justisa ho Ministériu Administrasaun Estatál (MAE) kona-ba kontratu serbisu, idak-idak iha responsabilidade hodibele presta serbisu iha komunidade.
Ministériu Justisa, nia dehan, alarga ona instituisaun tutelada sira iha munisípiu Baucau hanesan Ministériu Públiku, Defensoria Públika, Serbisu Rejistu Notariadu no tuir planu iha futuru sei alarga tan judisiál liuliu Tribunál Segunda Instánsia relasiona ho asuntu administrasaun justisa.
Tuir planu, balkaun únika sei implementa iha munisípiu hotu inklui Illa Ataúro, ho atendimentu prezensiál, móvel no telefóniku hodi simplifika prosedimentu administrativu, hadi’a efisiénsia no promove prosimidade entre administrativu públiku no sidadaun sira.
Balkaun únika bele fasilita halais liután burokrasia no sei laiha tan halibur malu tanba de’it atu halo dokumentu pesoál sira hanesan Billete Identidade (BI), pasaporte, sertidaun nasimentu (moris) no seluk tan.
Governu liuhosi reuniaun Konsellu Ministru, aprova Dekretu-Lei númeru: 3/2025, loron 22 janeiru, kona-ba balkaun únika no portál munisipál atu regulariza funsionamentu balkaun únika no portál munisipál atu reforsa desentralizasaun administrativa no moderniza serbisu públiku iha Timor-Leste.
Jornalista: Natalino Belo
Editór: Xisto Freitas da Piedade