iklan

EKONOMIA, HEADLINE

MTK klarifika kona-ba alokasaun orsamentu ba konstrusaun parajen transporte públiku

MTK klarifika kona-ba alokasaun orsamentu ba konstrusaun parajen transporte públiku

Minsitru Trasporte Komunikasaun, Miguel Marques Gongsalves Manetelu. Imajen Tatoli/Francisco Sony

DILI, 24 Janeiru 2025 (TATOLI) –Ministru Transporte no Komunikasaun (MTK), Miguel Marques Manetelo, halo klarifikasaun kona-ba orsamentu ne’ebé aloka ba kontrusaun parajen ba transporte públiku hamutuk sanulu, ne’ebé harii husi empreza Carisma Unipessoal Lda.

Membru Governu ne’e hateten, iha publikasaun notísia husi Agência Tatoli, foin lalais, kona-ba konstrusaun parajen públiku sanulu iha Dili ho montante rihun $96 ne’e klaru hela, tanba iha ne’ebá hateten progresu serbisu foin atinje 35%, enkuantu públiku barak mak kestiona ho nia orsamentu boot ne’e.

Atu klarifika katak prosesu konstrusaun ba parajen transporte públiku ne’e naruk, tanba husi ministériu prepara dezeñu, planta no kadernu enkargu (BoQ), hotu mak aprezenta ba Ministériu Obra Públika (MOP) haree hodi halo verifikasaun no lori bá Ajénsia Dezenvolvimentu Nasionál (ADN) halo mós verifikasaun ba dezeñu, liuliu haree kustu ne’e hira mak foin loke konkursu públiku.

“Konkursu públiku ne’ebé ita halo ho montante orsamentu rihun $96 ne’e bazeia ba verifikasaun husi Ajénsia Dezenvolvimentu Nasionál, la’ós ministériu mesak mak halo. Kuatu ne’ebé iha tanba sasán la’ós hola iha rai-laran, maibé husi rai-liur”, Miguel Manetelo informa ba jornalista sira iha nia edifísiu MTK, Caicoli, ohin.

Nia salienta katak públiku bele haree notísia Tatoli iha ne’ebá hateten konstrusaun foin atinje 35% katak hela 65%, signifika konstrusaun progresu seidauk hotu tanba parajen ne’e rasik sei harii hotu ho ekipamentu ba ema ho defisiénsia iha trotoár leten, liuliu defisiénsia ho kadeira roda ne’e.

Dezeñu parajen ba transporte públiku. Foto/Arminda Fonseca

Governante ne’e realsa bainhira ema ho defisiénsia ruma atu sa’e karreta, sira la presiza la’o maibé hein de’it iha parajen karreta nian no sira ho kadeira roda dudu tama ba karreta laran de’it.

Empreza Carisma prinxe kritériu ba konstrusaun parajen públiku sanulu

Iha sorin seluk, Jerente Empreza Carisma Unipessoal, Lda., Felizito Chang, hateten sira-nia kompañia sai manán-na’in ba projetu konstrusaun parajen públiku sanulu iha Dili, tanba prienxe kritériu sira husi Ministériu Transporte no Komunikasaun (MTK).

Nia dehan alokasaun ba parajen públiku ne’e to’o rihun $96, tanba inísiu tuir konkursu públiku husi Ministériu Transporte no Komunikasaun, hanesan na’in ba projetu, katak bazeia ba prosedimentu hothotu, sira mak prepara hahú husi planta no kadernu enkargu (BoQ, sigla inglés) to’o konkursu públiku.

Hodi relata katak bainhira loke konkursu públiku, empreza ualu mak kompete no ikus mai Carisma mak sai manán-na’in, tanba sira halo komparasaun ba orsamentu ne’ebé empreza tau.

“Orsamentu ne’ebé Ministériu Transporte no Komunikasaun tau iha konkursu públiku ne’e liu rihun $100, maibé husi kompania sira ne’ebe kompete ne’e sé mak tau valór ki’ik husi rihun $100 ne’e, nia mak sai manán-na’in, entaun momentu ne’ebá ami mak tau orsamentu ki’ik liu ona rihun $96 ne’e mak ami sai manán-na’in,” Felizito Chang dehan ba Tatoli via telefone, ohin.

Nia dehan, bazeia ba modelu dezeñu ne’e haree simples, maibé folin sasán ne’ebé tau iha BoQ nia-laran ne’e sasán mesak kualidade no karun tuir espesifikasaun Standar Nasional Indonesia nian no sasán balun iha Timór laiha hanesan kaca mika 10mm, Acp 4mm no guiding block.

“Osan rihun $96-resin ne’e la’ós ba parajen públiku ida de’it maibé ba sanulu no ita sura kasar kada parajen $9.600, inklui selu traballadór no sasán sosa husi li’ur mak mai. Sasán ne’ebé sira sosa mai ne’e la’ós naran bá hola, maibé kompañia sosa bazeia ba orientasaun husi tékniku MTK deside fatin mak kompañia bá sosa. Orsamentu rihun $96-resin ne’e ba ami hetan manán uitoan de’it, la’ós halo ami riku. Maibé, públiku kestiona ne’e normál, tanba sira seidauk kompreende didi’ak prosesu sira ne’e”, nia salienta.

Notísia relevante: Konstrusaun ba parajen transporte públiku finaliza iha Abríl

Jornalista: Arminda Fonseca

Editora: Maria Auxiliadora

iklan
iklan

Leave a Reply

iklan
error: Content is protected !!