BAUCAU, 24 janeiru 2025 (TATOLI)—Sekretariadu Tékniku Administrasaun Eleitorál (STAE) Baucau, sesta ne’e, distribui ona materiál sensitivu no la’ós sensitivu ba sentru votasaun iha suku foun ne’ebé atu hala’o eleisaun, sábadu (25/01/2025).
Diretór STAE Baucau, Natividade Freitas Guterres, esplika hafoin finaliza pakotamentu iha loron kinta (23/01/2025) ba materiál sensitivu no la’ós sensitivu, ohin distribui ona materiál hirak-ne’e bá sentru votasaun sia ho kondisaun di’ak no hetan seguransa husi Komandu Polísia Nasionál Timor-Leste (PNTL) Baucau.
“Materiál hirak-ne’e ita distribui no to’o ona iha sentru votasaun ho kondisaun seguru,” Natividade hateten ba TATOLI iha iha nia eskritóriu, Vila Nova, Baucau.
Nia hatutan katak materiál eleisaun suku ne’ebé transporta ba sentru votasaun hamutuk kaixote 18 ne’ebé utiliza kareta neen.
Tuir lei suku númeru: 9/2009 hateten prosesu eleisaun ba líder suku sei loke sentru votasaun iha tuku 07:00 Otl hodi simu kandidatura xefe aldeia, delegadu no delegada maibé tanba líder aldeia antes ne’e eleitu ona nune’e prosesu eleisaun xefe suku sei hala’o iha tuku 09:00 Otl.
Notísia relevante: STAE finaliza pakotamentu materiál eleisaun suku foun iha Baucau
Suku foun ne’ebé sei realiza eleisaun iha 25 janeiru hodi hili líder suku kompostu husi suku Builai no Caibada Makasa’e lokalizadu iha postu administrativu Baucau Vila, enkuantu suku Ueru-Mata pertense ba postu administrativu Laga.
Suku Builai iha aldeia haat mak hanesan Builai, Alala, Manulao no Samalaculiba. Caibada Makasa’e iha aldeia haat kompostu hosi Boru-baha, Caiobilale, Data-ua no Maulame no suku Ueru-Mata aldeia iha ida mak aldeia Ueru-Mata.
Eleisaun suku foun iha Baucau ne’e sei envolve eleitór hamutuk 3.500 resin kompostu husi suku Builai eleitór 1.600 resin, Caibada Makasa’e 1.600 resin no Ueru-Mata hamutuk eleitór na’in 300 resin.
Kandidatura xefe suku hosi suku tolu ne’ebé mensionadu hamutuk na’in hitu kompostu mane na’in neen, feto ida. Suku Builai kandidatu na’in tolu, Caibada Makasa’e na’in tolu (mane rua no feto ida), enkuantu suku Ueru-Mata iha kandidatu na’in ida.
Suku foun tolu ne’e estabelese hosi VIII Governu Konstitusionál ne’ebé lidera hosi Jenerál Taur Matan Ruak no nia estabelesementu bazeia ba Lei Suku númeru: 19/2023 ne’ebé previstu iha artigu 91, iha-ne’ebé fó kompeténsia ba Ministériu Administrasaun Estatál (MAE) deside kriasaun suku foun referidu. Nune’e, iha munisípiu Baucau totál suku akrese ona ba 62 hosi postu administrativu ualu mak hanesan postu administrativu Baucau Vila, Vemasse, Venilale, Laga, Baguia, Quelicai, Matebian no Quelicai Antiga.
Jornalista: Natalino Belo
Editór: Xisto Freitas da Piedade
