Komunidade entusiaz partisipa eleisaun suku
BAUCAU, 25 janeiru 2025 (TATOLI)—Sekretariadu Tékniku Administrasaun Elitorál (STAE) Baucau konsidera taxa partisipasaun komunidade ba eleisaun líder suku foun tolu iha munisípiu Baucau sa’e.
“Eleitór sira entusiaz tebes partisipa tanba sira luta kle’ur atu estabelese suku,” Diretór STAE Baucau, Natividade Freitas Guterres hateten iha suku Builai, Baucau, sábadu ne’e, hafoin ekipa sira kompostu husi Autoridade Administrasaun Munisipál, Polísia Nasionál Timor-Leste (PNTL) inklui STAE halo observasaun ba prosesu eleisaun iha terenu.
Tuir Natividade, númeru taxa partisipasaun ba eleisaun suku foun tolu referidu aas tanba komunidade husi suku foun tolu hein tinan naruk kona-ba estabelesementu suku.
Nia esplika, tuir lei suku, kada sentru votasaun hahú loke iha dadeersan tuku 07:00 Otl hodi forma meza inklui simu kandidatura xefe aldeia, delegadu no delegada maibé tanba líder aldeia antes ne’e eleitu ona nune’e iha prosesu votasaun hahú fali iha tuku 09:00 Otl no sei taka iha lorokraik tuku 03:00 Otl.
Notísia relevante: Situasaun seguransa eleisaun suku iha Baucau kontroladu
Bainhira sentru votasaun taka sei kontinua bá kontajen inisiál iha aldeia no hafoin ne’e kontinua kedas distribui akta bá sede suku hodi kontinua halo apuramentu iha loron domingu (26/01/2025).
Kada kandidatura bele eleitu ba xefe suku bainhira hetan votu pursentu 50+1 bá leten, maibé kuandu la to’o ba kritéria mensionada sei kontinua bá volta daruak.
Munisípiu Baucau realiza eleisaun suku foun tolu kompostu husi suku Builai hamutuk aldeia haat hanesan Builai, Alala, Manulao no Samalaculiba. Suku Ueru-Mata iha aldeia ida mak Ueru-Mata. Caibada Makasae iha aldeia haat kompostu hosi Boru-baha, Caiobilale, Data-ua no Maulame.
Eleisaun suku foun iha Baucau ne’e sei envolve eleitór hamutuk 3.500 resin kompostu husi suku Builai eleitór 1.600 resin, Caibada Makasae 1.600 resin no Ueru-Mata hamutuk eleitór na’in 300 resin.
Kandidatura xefe suku hosi suku tolu ne’ebé mensionadu hamutuk na’in hitu kompostu mane neen, feto ida. Suku Builai kandidatu na’in tolu, Caibada Makasae na’in tolu (mane rua no feto ida), enkuantu suku Ueru-Mata iha kandidatu na’in ida.
Estabelesementu suku foun iha Timor laran bazeia ba Lei Suku númeru: 19/2023 ne’ebé previstu iha artigu 91, fó kompeténsia ba Ministériu Administrasaun Estatál (MAE) deside kriasaun suku foun referidu.
Jornalista: Natalino Belo
Editór: Xisto Freitas da Piedade
