DILI, 26 janeiru 2025 (TATOLI)—Diretór Sekretariadu Tékniku Administrasaun Eleitorál (STAE) Manatuto, Mariano Natalino Soares da Silva, hateten eleisaun ba líder suku foun Iliheu, postu administrativu Manatuto, munisípiu Manatuto, hakat bá segunda volta, maibé suku Laku Mesak primeira volta.
”Iha munisípiu Manatuto ne’e, iha suku foun rua mak akontese eleisaun, mak hanesan suku Laku Mesak no suku Iliheu, maibé suku Iliheu hakat bá segunda volta. Entretantu, husi suku Laku Mesak, kandidatu Luís Mendonça mak eleitu iha primeira volta,” Mariano hateten ba TATOLI via telefónika, domingu ne’e, relasiona ho eleisaun órgaun suku ne’ebé hala’o iha sábadu (25/01/2025)
Nia dehan, iha suku Iliheu, kandidatu sira ne’ebé kompete mak Antoninho Soares ho votu hamutuk 183, kandidatu Jentelino G. Soares ho votu 169, kandidatu Francisco Paulo Soares ho votu 342 no agora avansa bá segunda volta mak kandidatu Antoninho Soares no kandidatu Francisco Paulo Soares tanba sira la prenxe kritériu 50%+1.
Notísia relevante: Eleisaun ba suku rua iha Manatuto hahú ona
Husi suku Laku Mesak, nia haktuir, kandidatu Francisco dos Santos hetan votu 100, kandidatu José Godinho Carvalho Cárceres ho votu 120, kandidatu Luís Mendonça ho votu 878 no kandidatu Luís mak sai vensedór.
Totál votante husi suku Laku Mesak hamutuk 1.700 resin no suku Iliheu totál votante hamutuk 1.030. Suku Iliheu iha aldeia rua mak hanesan Ilihuli ho Ihun, entretantu suku Laku Mesak iha aldeia lima mak hanesan Hatu Conan, Labubu, Nacaleo, Readodoc, Tahagamu.
Bazeia ba lei númeru: 9/2016 no Dekretu-Governu númeru: 14/2016, katak hafoin loron 15 kontinua kedas ba eleisaun segunda volta, ba kandidatu sira ne’ebé avansa ba eleisaun segunda volta, sura husi loron eleisaun 25 janeiru 2025, ne’ebé sei akontese iha fevereiru.
Estabelesementu suku foun sira iha Timor-Leste bazeia ba Lei Suku númeru: 19/2023 ne’ebé previstu iha artigu 91, iha-ne’ebé fó kompeténsia ba Ministériu Administrasaun Estatál (MAE) deside kriasaun suku foun referidu.
Jornalista: Felicidade Ximenes
Editór: Xisto Freitas da Piedade
