DILI, 27 janeiru 2025 (TATOLI)—Ministru Interiór, Francisco da Costa Guterres, hateten Ministériu Interiór (MI) sei forma komisaun ida hodi avalia servisu Polísia Nasionál Timor-Leste (PNTL), Servisu Migrasaun no Protesaun Sivíl hodi mellora servisu instituisaun referida sai di’ak liután.
“Ita sei kria komisaun ida atu tau-matan ba instituisaun seguransa tomak hodi haree problema iha instituisaun polísia ne’e, liuliu haree difikuldade saida mak sira enfrenta entermu legalidade no lojístika,” Francisco Guterres hateten iha nia intervensaun bainhira partisipa serimónia avaliasaun prioridade lima Komandu Jerál PNTL 2023-2028 ne’ebé hala’o iha Suai Room, Timor Plaza, segunda ne’e.
Nia esplika, Polísia Nasionál Timor-Leste durante ne’e halo servisu ho di’ak, liuliu hanesan iha 2017, maski enfrenta situasaun krize institusionál, maibé mantein hatudu profisionalizmu hodi serbí Estadu no povu.
Nia dehan, iha eleisaun prezidensiál 2022, situasaun iha ámbitu primeira volta no segunda volta, ne’e la’o di’ak, eleisaun parlamentár 2023 la’o di’ak, eleisaun ba órgaun suku iha 2023 la’o hakmatek no situasaun vizita Sua Santidade Papa Francisco iha 2024 mós la’o di’ak.
Tuir nia kakat polísia labele sai fatin ba intervensaun podér polítiku, maibé atu halo atuasaun tenke rona komandu ida, labele rona ida-ne’e no ida-ne’ebá.
Francisco rekoñese katak iha 2007 to’o 2009 polísia enfrenta krize lideransa, maibé depoizde IV Governu Konstitusionál halo tiha reforma radikál iha 2010, hatuur hikas PNTL nu’udár instituisaun seguransa ho nia estrutura ne’ebé halo nia kna’ar kumpri lei no órden.
Governante ne’e husu ba membru PNTL sira hotu tau interese Estadu boot-liu duké interese privadu, nune’e bele dezenvolve instituisaun ne’e ho di’ak liután.
Iha fatin hanesan, Komandante Jerál PNTL, Komisáriu Jerál Polísia Henrique da Costa, informa ba membru Polísia Nasionál Timor-Leste atu tau importánsia ba kestaun sia no kestaun sia ne’e mak sai matadalan ba membru hotu atu dezenvolve instituisaun polísia ne’e ho di’ak.
Nia esplika, pontu sia ne’e mak hanesan membru hotu tenke hasa’e kualidade servisu, transparénsia no akuntabilidade, foti desizaun ne’ebé di’ak ho adekuada iha servisu fatin, hadi’a polítika komandu nian, prevene utiliza podér ne’ebé laloos, hasa’e profisionalizmu, efisiénsia iha rekursu umanu, kumpri ba regulamentu no identifika problema.
Iha biban ne’e, Komandante Jerál PNTL ne’e mós agradese ba Ministériu Interiór ne’ebé sempre suporta atividade komandu PNTL nian no ho kolaborasaun ida-ne’e bele dezenvolve di’ak instituisaun polísia nian iha futuru.
Nia mós kongratula parseiru nasionál no internasionál inklui komunidade ne’ebé apoia PNTL hodi garante pás no estabilidade.
Jornalista: Natalino Costa
Editór: Xisto Freitas da Piedade
