DILI, 28 janeiru 2025 (TATOLI)—Prezidente Repúblika (PR), José Ramos Horta, husu ba Governu Austrália atu hamenus taxa ba traballadór timoroan sira-ne’ebé daudaun ne’e servisu hela iha Austrália.
“Ministru ne’e responsável ba forsa traballu ne’ebé servisu iha Austrália, nia di’ak tebes. Iha sorumutu ne’e, ami diskute liu kona-ba forsa traballu Timor-Leste ne’ebé servisu iha Australia. Primeiru, atu hasa’e númeru traballadór no segundu oinsá traballadór sira bele moris di’ak liután, liuhusi hamenus pagamentu impostu. Tanba, agora daudaun, ita-nia traballadór sira iha Austrália maske sira lahetan asisténsia saúde, livre tanba sira ema estranjeiru maibé sira selu taxa ne’ebé aas tebes,” Prezidente Repúblika (PR), José Ramos Horta, hateten ba jornalista sira hafoin ramata enkontru ho Ministru Negósiu Interiór Austrália, Tony Burke, iha palásiu Prezidensiál Nicolau Lobato, Bairru Pite, tersa ne’e.
Tanba ne’e, Xefe Estadu husu ba Austrália atu hamenus taxa ba traballadór timoroan ne’ebé servisu iha Austrália, nune’e sira-nia saláriu bele haruka ba sira-nia família iha Timor-Leste.
“Ha’u hatene katak Governu Austrália kaer metin lei direitu umanu, maibé patraun balun trata sira-nia funsionáriu ladi’ak, tanba ne’e balun kesar ona. Ne’e la’ós de’it akontese ba traballadór timoroan maibé traballadór husi nasaun seluk mós sira-nia esperiénsia ne’ebé hanesan,” nia dehan.
Prezidente subliña, Governu Austrália atu kaer problema ne’e tanba Governu Austrália kumpre makaas regulamentu direitu umanu, maibé xefe empreza balun viola regulamentu hirak ne’e.
Aleinde ne’e, durante enkontru, Prezidente mós orgullu ho kooperasaun entre Timor-Leste ho Austrália iha área seguransa no defeza durante tinan 20-resin nia laran.
“Nu’udar Prezidente, ha’u haksolok tebes ho kooperasaun ho Austrália iha área Seguransa no Defeza nian, ne’ebé durante tinan 20-resin ona membru Austrália sira servisu di’ak tebes ho FALINTIL-Forsa Defeza Timor-Leste (F-FDTL), no fó apoiu barak mós husi Polisia Federal Australia (AFP), mai ita-nia Polísia sira,” nia dehan.
Prezidente mós fó nia hanoin katak sistema polísia ne’ebé di’ak liu maka AFP iha Austrália ne’ebé laiha Polísia ho espesialista barak.
Jornalista : Hortencio Sanchez
Editór : Cancio Ximenes
