Top

MJ simu ona rezultadu auditoria ba kazu mál pratika iha Servisu Notariadu

Ministru Justisa, Sergio Hornai. Imajen TATOLI/Egas Cristovão

DILI, 28 janeiru 2025 (TATOLI)—Ministru Justisa, Sergio de Jesus Fernandes da Costa Hornai, hateten Ministériu Justisa (MJ) simu ona rezultadu auditoria ba Servisu Rejistu Konservatóriu Notariadu Munisípiu Dili, ne’ebé deskonfiadu mosu irregularidade iha atendimentu emisaun Billete Identidade.

Kazu ne’e akontese iha segunda (13/1), iha-ne’ebé deskonfia iha funsionáriu ida husi Servisu Rejistu Konservatóriu Notariadu Munisípiu Dili pratika subornu tanba fasilita nia maluk ida hodi hetan osan.

Átu funsionáriu referidu, virál iha mídia sosiál facebook no hafoin ne’e Ministru Justisa orienta kedas Gabinete Inspesaun Auditoria (GIA) Ministériu Justisa halo inspesaun ba Servisu Rejistu Konservatóriu Notariadu Munisípiu Dili.

“Momentu ne’ebá ha’u haruka kedas Gabinete Inspesaun Auditoria ne’ebé hanaran GIA iha Ministériu Justisa halo kedas inspesaun ba Servisu Rejistu Konservatóriu Notariadu Munisípiu Dili hodibele hatene kestaun ne’e akontese duni ka lae. Relatoiu ha’u simu ona. Ha’u halo leitura ona. Maibé, ha’u labele pronúnsia lai tanba ne’e segredu,” Sergio Honai hateten ba jornalista sira iha Gabinete Ministru Justisa, Colmera, Dili tersa ne’e.

Nia dehan, razaun la fó sai rezultadu inspesaun ne’ebé GIA halo ne’e tanba ne’e liga ba segredu profisionál no segredu justisa.

“Kuandu liga ona ba kestaun ilísitu ka kestaun krime, entaun ne’e iha órgaun própriu Polísia Sientífika Invesitigasaun Kriminál mak haree, maibé kuandu iha kestaun administrativa, ha’u sei haruka ba Servisu Rejistu Konservatóriu Notariadu Munisípiu Dili atu hadi’a sistema,” nia informa.

Nia afirma, hanesan Ministru Justisa, nia seidauk bele fó konkluzaun ba Servisu Rejistu Konservatóriu Notariadu Munisípiu Dili.

“Ha’u seidauk bele sujeita ema ida iha prosesu ne’e tanba ha’u seidauk foti konkluzaun ba ema ida-ne’e no ida-ne’ebá mak sala. Imi pasiénsia uitoan, ha’u hanoin ita sei servisu to’o iha ne’ebá,”  nia konklui.

Jornalista: Natalino Costa

Editór: Xisto Freitas da Piedade

Publisidade

Leave a Reply

Latest Post

error: Content is protected !!