DILI, 31 janeiru (TATOLI)- Governu Austrália liuhusi Adidu Defeza Austrália ba Timor-Leste, Kapitaun Mar e Guerra, Matthew Richardson, sesta ne’e, entrega ofisialmente salaun memoriál Hall, ne’ebé konstrui iha Sentru Instrusaun Komandante Nicolau Lobato (CICNL, siglá Portugés), Metinaro ba Komandu FALINTIL-Forsa Defeza Timor Leste (F-FDTL).
Salaun Memoriál Hall ne’e konstrui husi empreza RMS Austrália iha Timor-Leste iha inisiu 14 Setembru 2024 no ramata iha meadu fulan ne’e.
¨Salaun memorial Hall ida ne’e nudar vizaun husi Tenente Jeneralá Falur Rate La’ek ba nia membru F-FDTL no ba komunidade veteranus sira. Nune’e ha’u entrega sala memoriál ho respeitu no agradesimentu boot. Austrália kontinua iha istória naruk ho orgullu no amizade ho Timor-Leste ¨, Adidu Defeza Australianu hateten iha nia intervensaun iha serimónia entrega salaun memorial Hall ba Komandu FALITIL-Forsa Defeza Timor Leste iha Metinaro.
Ho apoia ne’e, Diplomata Australianu ba asuntu militár ne’e afirma Governu Austrália sente ondradu hodi halo edifisiu ida ne’e tanba nu’udar testamuña ida ba amizada ida ne’ebé dura no iha valór ne’ebé metin.
¨Fatin ne’e atu fó ondra ba sira ne’ebé mate ona. Ida-ne’e mak fatin reflete ema hotu nia aspirasaun husi rezilénsia ema ki’ik ida ne’ebé atu atinje buat boot sira, liuhusi unidade no determinasaun. Ida-ne’e hatudu forsa estraodinária Timor-Leste nian, no idan-ne’e hanesan lembransa ida ba ita hotu kona-ba saida mak ita bele atinje bainhira Ita hamri’ik hamutuk¨, katak nian.
Uma memorial Hall ida ne’ee sei tau tais sira husi munisípiu no pintura husi veteranu sira, gerilleiru sira, líder sira no funu-nain sira tanba ho sira nia aten-berani mak defende ezisténsia Timor-Leste to’o hetan independesia másimu.
Nune’e, husu ba membru F-FDTL sira atu kuidadu salaun memorial ne’e nudar fatin ba istória hodi reflete sakrifisiu sira, atu inspira jerasaun sira iha futuru.
Komandu F-FDTL agradese ba Governu Austrália
Entretantu, Xefe Estadu Maiór Jenerál FALINTIL-Forsa Defeza Timor-Leste (F-FDTL) Tenente Jenerál, Domingos Raul “Falur Rate-Laek”, hato’o agradesimentu ba Govenru Austrália tanba fó apoia hodi konstrui no entrega ofisiál ona.
“Ha’u agradese ba Governu Austrália ba apoia sira ne’ebé imi fó mai ami hodi konstrui salaun memoriál ida-ne’e. Ba tékniku sira ha’u mós la huhan fó ha’u nia agradesimentu imi nia apoia hodi konstrui”, Falur agradese.
Ho apoia ne’e, Tenente Jenerál ne’e kontinua kompromisu hodi hametin di’ak liután kooperasaun entre Timor-Leste ho Austália liuliu apoia iha área dezenvolvimentu forsa armada.
Notísia relevante: Austrália apoia botas militár 1000 ba F-FDTL
Jornalista: Natalino Costa
Editór: Florencio Miranda Ximenes
