DILI, 31 Janeiru 2025 (TATOLI) – Ministru Investimentu, Komérsiu no Indústria Malázia, Datuk Seri Utama Tengku Zafrul Abdul Aziz, no nia delegasaun hasoru malu ho Primeiru-Ministru, Xanana Gusmão, hodi ko’alia kona-ba vontade atu apoia dezenvolvimentu Timor-Leste nian.
“Ami hasoru-malu ko’alia ein jerál de’it, maibé Malázia hakarak koopera ho Timor-Leste, liuliu atu dudu ita-nia prosesu dezenvolvimentu iha Timor-Leste”, Xanana Gusmão hateten iha Palásiu Governu, ohin.
Xefe Governu ne’e dehan katak prezensa Datuk Seri iha Palásiu Governu mós hodi relata kona-ba sai sasin ba serimónia asinatura Memorandum of Understanding (MoU) entre empreza Estatál Timor GAP, E.P ho Weststar Malázia ba investimentu projetu tasi-mane.
“Ministru Investimentu, Komérsiu no Indústria Malázia mai iha-ne’e lori mós nia maluk sira ne’ebé asina tiha MoU ida ho Timor GAP. Sira hakarak investe iha ita-nia projetu tasi-mane. Ne’ebé di’ak tebtebes, ita husu kompañia sira husi Austrália bele loke dalan daudaun atu ita asina tiha akordu lalais, nune’e maluk sira seluk mós bele mai investe”, Xanana afirma.
Iha sorin seluk, Ministru Investimentu, Komérsiu no Indústria Malázia, Datuk Seri Utama Tengku Zafrul Abdul Aziz, hateten nia ho nia ekipa kontente tanba bele hasoru-malu ho Primeiru-Ministru, Xanana Gusmão ho ministru sira seluk Timor-Leste nian.
“Iha reuniaun ohin hato’o kona-ba ohin ita sai testamuña ba empreza Malázia no Timor-Leste bele serbisu hamutuk, iha ne’ebé ita hare oinsá Timor GAP no Weststar hahú sira-nia kolaborasaun iha investimentu boot ida entre kompania rua ne’e hodi sapoia kreximentu setór aviasaun”, nia dehan.
Aleinde ne’e, kontinua kompromisu hodi apoia Timor-Leste atu sai hanesan membru ASEAN, tuir kompromisu ne’ebé antes ne’e Primeiru-Ministru Malázia, YAB Dato’ Seri Anwar bin Ibrahim hato’o ona.
“Ami mós iha ne’e atu apoia komérsiu no investimentu entre nasaun rua ne’e, tanba iha poténsia barak”, nia salienta.
Notísia relevante: Primeiru Ministru Malázia promete apoia TL adere ba ASEAN iha 2025
Jornalista: Arminda Fonseca
Editora: Maria Auxiliadora
