DILI, 03 dezembru 2024 (TATOLI)-Primeiru-Ministru (PM), Kay Rala Xanana Gusmão, hateten, durante vizita ofisiál iha Malázia hasoru malu ho nia ómologu Xefe Governu Dato’ Seri Anwar Ibrahin, hakarak tebtebes atu fó apoiu tomak bá Timor-Leste ninia preparasaun sira atu bele adere lalais ba Organizasaun Rejionál Association of Southeast Asian Nations (ASEAN) iha tinan 2025.
Asuntu ne’e Primeiru-Ministru Malázia espresa durante simu vizita husi Primeiru-Ministru (PM) Timor-Leste, Kay Rala Xanana Gusmão ho delegasaun iha Palásiu Perdana Putra, Purtajaya, Kuala Lumpur, Malázia.
“Iha Malázia hasoru Primeiru-Ministru Malázia Ibrahim. Ha’u ba tamba nia mak konvida atu ko’alia kona-bá oinsá sira bele ajuda ita atu bele tama lalais bá ASEAN. Enkontru la’o di’ak tebtes no Primeiru-Ministru Ibrahim hakarak tebetebes atu apoia ita sai membru ASEAN iha tinan 2025,” Primeiru-Ministru Xanana Gusmão hateten ba jornalista sira iha Aeroportu Internasionál Prezidente Nicolau Lobato Dili, tersa ne’e.
Nia dehan, vizita ida-ne’e realiza bazeia ba ajenda ne’ebé parte rua deside ona bainhira hasoru-malu iha simeira ASEAN nian foin lalais iha Laos no PM Xanana fó hatene ona kona-bá área saida mak Timor-Leste presiza tebes atu kompleta tán bazeia bá rekezitu sira hanesan dalan bá ASEAN nian.
Durante hasoru-malu Primeiru-Ministru Malázia espresa prontidaun katak, sei halo esforsu atu oinsá Timor-Leste bele kompleta lalais roteiru sira ne’ebé iha hodi bele sai lalais membru permanente bá ASEAN iha tinan 2025.
PM Xanana konta katak, PM Malázia promete bainhira lidera ASEAN, iha tinan oin sei halo buat hotu-hotu ne’ebé mak presiza atu bele tulun nasaun maun alin Timor-Leste liu-liu sei fasilita liu tán prosesu hodi aselera liu tan no hein atu Timor-Leste bele sai hanesan membru permanente iha tinan 2025.
Asuntu seluk ne’ebé parte rua ko’alia maka kooperasaun bilaterál entre nasaun rua nian iha área infraestrutura, agro-indústria, pekuária, defeza, seguransa, edukasaun, saúde no seluk tán.
Aproveita vizita ne’e, Governu Timor-Leste reprezenta hosi Ministru Negósius Estranjeirus no Kooperasaun (MNEK), Bendito dos Santos Freitas no Ministru Negósius Estranjeirus Malázia, Mohammad Hassan, troka akordu kooperasaun tolu ne’ebé antes ne’e asina ona iha Díli.
Akordu tolu ne’e maka kona-bá izensaun vístu ba titulár passaporte servisu no diplomátiku, akordu relativamente ho terrenu instalasaun embaixada Malázia nian iha Dili no anúnsiu kona-bá operasaun aviaun Batik Air hosi Malázia.
Iha serimónia bem-vindu molok ekontru bilaterál, autoridade sira Malázia nian simu PM Xanana ho Onra da Guarda no kontinua ho aprezentasaun membru Governu ida-idak hosi Primeiru-Ministru na’in-rua.
Delegasaun ne’ebé akompaña Xefe Governu durante enkontru mak hanesan Vise Primeiru-Ministru no Ministru Koordenadór Assuntus Ekonómikus no Ministru Turízmu no Ambiente, Francisco Kalbuadi Lay, Ministru Ensinu Superiór Siénsia no Kultura, Ministra Saúde, Élia dos Reis Amaral, Vise-Ministra ba Assuntu ASEAN, Sekretáriu Estadu Komunikasaun Sosiál, Expedito Dias Ximenes, Embaixadór Timor-Leste bá Malázia, Lisualdo Gaspar, Embaixadór Malázia bá Timor-Leste, Amarjit Sarjit Shin.
Jornalista: Hortencio Sanchez
Editòr: Florencio Miranda Ximenes
