OÉ-CUSSE, 31 Janeiru 2025 (TATOLI) – Xefe Suku Usitsa’e, Tomas Ulan Colo, informa, udan-bo’ot ne’ebé akontese iha semana ne’e, konsege estraga toos komunidade nian hamutuk neen iha bairru Bitanam, aldeia Buqui suku Usitasa’e, Rejiaun Administrativa Espesiál Oé-Cusse Ambeno (RAEOA).
“Ha’u koordena ona xefe aldeia atu rekolla dadus, tanba ita haree batar hetan estragu totál,” Xefe suku Tomas ne’e hatete ba Ajénsia Tatoli,I.P iha Oé-Cusse, ohin.
Bainhira rekolla ona dadús, nia dehan segunda semana oin sei hatama pedidu rua ba parte Agrikultura no Autoridade Protesaun Sivil (APC) atu haree, tanba ai-han sira hanesan batar, hare, ai-farina no seluk taan hetan estragu totál.
Hataan asuntu ne’e, Komandante Operasionál Autoridade Protesaun Sivil (APC) Oé-Cusse, João Sila, sei koordena ho agrikultura, tanba ne’e kompeténsia servisu agrikultura nian.
“Ami haree liu ba tipu dezastre inséndiu ka ai-han uma, anin bo’ot estraga uma no rai halai hodi estraga toos ne’e kompeténsia agrikultura nian,” nia dehan.
Entretantu, Sekretária Rejionál ba Asuntu Agrikultura, Filomena Sila, dehan, parte agrikultura prontu apoia maibé presiza pedidu ofisiál husi autoridade komunitáriu suku Usitasa’e.
“Ami seidauk hetan pedidu, kuandu pedidu tama ona, ita bele apoia, maibé iha semana oin, parte agrikultura sei tuun ba terenu hodi observa fatin akontesimentu ne’e, nune’e ita bele ajuda ai-han balu, ami mós akompaña iha mídia sosiál kona-ba akontesimentu ne’e, ne’ebé ami sei hein xefe suku atu hatama pedidu mai, uma-kain hira mak hetan estragu, ai-han saida mak estraga, nune’e ita bele hato’o ba Prezidente Autoridade hodi bele fornese apoia,” nia kompromete.
Notísia relevante:RAEOA publika mapeamentu ba rai afetadu hodi prepara halo pagamentu
Jornalista: Abílio Elo Nini
Editór: Florencio Miranda Ximenes
