DILI, 01 fevereiru 2025 (TATOLI)– Estrutura Federasaun Futeból Timor-Leste (FFTL), sabadu ne’e, hala’o desizaun hodi hili Santo Don Bosco sai mahein persanente ba instituisaun futeból ne’e.
“Ita halibur malu iha ne’e, konvida Padre Manuel Fernandes Pinto, SDB mai atu fó bensaun ba ita nia estatua Don Bosco atu bele sai mahein ba ita iha instituisaun ida ne’e, Don Bosco agora sai ona hanesan ita nia padroeiru ba ita nia atividade hotu,” dehan Prezidente FFTL, Nilton Telmo Gusmão Dos Santos, iha serimonia ne’ebé realiza iha edifisiu FFTL, Bairru dos Gruilhos,Dili.

Prezidente FFTL dehan instituisaun futeból ne’e importante tebes atu iha mahein ida hanesan Santo Don Bosco hodi proteje nafatin instituisaun tuir fiar espirituál nian.
Nune’e, nia husu ba funsionáriu hotu atu hala’o servisu hotu iha instituisaun ne’e tenke banati tuir Don Bosco nian.
“Fiar katak ba oin Don Bosco sei fó kbiit ba ita atu hala’o servisu hotu ho di’ak atu tau-matan ba ita nia foinsa’e sira. Ita hotu ohin mai iha ne’e tanba ita iha paixaun duni ba ita nia futeból no ita iha komprimisiu boot atu halo buat ruma iha tinan ida ne’e,” Nilton dehan.
Husu ba funsionáriu hotu atu hala’o servisu ho responsabilidade, onestidade no halo buat hotu tuir regulamentu, hapara ona atividade falsifikasaun ba dokumentu hotu liuliu tinan ba jogadór sira.
“Ita hotu hala’o servisu hodi lori futeból ba oin, ita tenke hapara ona falsifikasaun ba dokumentu sira, tanba ida ne’e la’ós parte ida husi transforma futeból sai orgullu nasionál,” nia hakotu.
Partisipa iha serimonia ne’e Assosiasaun Futeból husi Munisípiu hotu, jogadór selesaun nasionál balun no estrutura órgaun Liga Futeból Timor-Leste.
João Bosco moris ho naran batizmu Giovanni Melchiorre Bosco iha loron 16 fulan-Agostu 1815, iha Becchi, knua ki’ik ida iha Castelnuovo d’Asti (agora hanaran Castelnuovo Don Bosco), Itália. Ninia aman, Francesco, ema toʼos-naʼin neʼebé kiak. Francesco iha oan-mane na’in tolu: António (husi nia feen dahuluk ne’ebé mate ona), José no João. Francesco mate bainhira João Bosco foin iha tinan rua.
João Bosco ho naran koñesidu Don Bosco nu’udar guardiaun furak liu ba foin-sa’e sira. Nia dedika nia moris tomak ba juventude. Don Bosco nu’udar edukadór loloos, laran-di’ak, komiku, mestre májika no akrobasia nian. Nia divertidu tebes, ita-boot sei hamnasa maka’as duni se nia hamutuk ho nia.
Notisia relevante:F-FDTL Tenke Banati Tuir Mahein São Miguel Arcanjo
Jornalista: Hortencio Sanchez
Editór: Florencio Miranda Ximenes